L.Tolstoı atyndaǵy oblystyq kitaphanada «Ulttyq valıýta – Qazaqstan táýelsizdiginiń belgisi» atty kitap kórmesi ashyldy. Qazaq teńgesiniń arǵy-bergi tarıhy men táýelsiz Qazaqstandaǵy aqsha qatynasynyń qalyptasýy, sondaı-aq elimizdiń ekonomıkalyq damýy jónindegi 100-ge jýyq ǵylymı-tanymdyq eńbekter kórinis tapqan kórmeniń ashylý rásimine jergilikti ǵalym-ustazdar, stýdentter men oqýshylar, bank salasynyń ókilderi, áskerıler qatysty.
Tól teńgemizdiń 30 jyldyǵyna oraı uıymdastyrylǵan kórme tórt bólimnen turady. «Aqsha tarıhy – halyq tarıhy» dep atalatyn alǵashqy bólimge qoıylǵan kitaptar qazaq teńgesiniń yqylym zamandardaǵy tarıhyn, Uly Jibek jolynda jatqan Otyrar qalasy sııaqty iri saýda ortalyqtaryndaǵy aqsha qatynasy týraly baıandaıdy.
Al «Teńge – eldiktiń erekshe belgisi» atty bólimde teńge avtorlary men ulttyq valıýtanyń qalyptasyp, damýyn baıandaıtyn irgeli eńbektermen qatar, kúndelikti buqaralyq basylymdarda jarııalanǵan tanymdyq maqalalardyń qıyndylary qoıylǵan. Bul bólimdegi eńbekterdiń ishinde teńge dızaınin jasap shyqqan avtorlardyń biri, sýretshi Haırolla Ǵabjálelovtiń «Teńge» kitabyna qyzyǵýshylyq tanytqandar kóp boldy.
Saltanatty rásimge arnaıy kelgen Ulttyq bank fılıalynyń ókilderi kópshilikke mereıtoılyq jáne eskertkish monetalar jıyntyǵyn kórsetip, ár monetanyń shyǵý tarıhyn áńgimeledi.
Kitaphanashy Shárıpa Dosjanovanyń aıtýynsha, «Qazaqstan ekonomıkasy: keshe jáne búgin» dep atalatyn tórtinshi bólimde elimizdegi ekonomıkalyq reformalar men naryqtyq qatynastardyń qalyptasyp, damýy jónindegi ǵylymı eńbekter qoıylǵan. Kópshilik oqyrman zalyna qoıylǵan kórme jyl sońyna deıin jumys isteıdi.
Qostanaı oblysy