Keshe Azııa oıyndaryn uıymdastyrý komıtetiniń uıytqy bolýymen jýrnalısterge arnalǵan medıa týr ótti. Is-sharaǵa qatysýǵa birneshe eldiń BAQ ókilderi nıet bildiripti. Onyń ishinde osy joldyń avtory da bar.
Alǵashqyda qalaı bolady eken, ýaqytty qur ótkizip almaımyz ba, dep alańdadyq. Sebebi keshe jarys jolyna veloshabandoz qyzdarymyz, grek-rım sheberleri, boksshy qyzdar ónerlerin kórsetetin edi. Sol saıystarǵa úlgermeı qalmaımyz ba, degen oı da boldy. Joq, barlyǵyna úlgerdik. Tańerteń veloshabandozdar saıysyn tamashaladyq, velosporttaǵy qyzdarymyzǵa rızamyz. Sebebi Azııa oıyndaryna tuńǵysh qatysyp otyrǵan Rınata Sultanova men Mahabbat Úmitjanova jalpy toppen birge júrip ótti. Aldaǵy ýaqytta osy eki qyz el abyroıyn asqaqtatady dep senemiz.
Sonymen uıymdastyrýshylar túski 13:00-de BAQ ókilderi bas qosatyn MRS ortalyǵynan 30-ǵa jýyq jýrnalısti arnaıy avtobýspen qaladaǵy Qytaı «Desing» mýzeıi men «Art» akadamııasyna alyp bardy. Iran, Qatar, Mońǵolııa, Úndistan tilshileri men jergilikti BAQ ókilderi medıa týrda aldymen Hanchjoýdyń tarıhyn tanysýmen bastady. Ári qaraı mýzeı dırektory Shınıang Jang Qytaı ıeroglıfteriniń shyǵý tarıhy jáne damý kezeńderi týraly aıtty.
Onyń aıtýynsha, Qytaı ıeroglıf-teri álem halyqtary jazbalarynyń ishinde ózindik ereksheligimen kózge túsedi. Qytaı tilinde shamamen 60 myńǵa jýyq ıeroglıf bar desek, sonyń ishinde 47 myńnan astamy áıgili Kansı sózdigine engizilgen. Onyń ishinde 3 myńnan astamy buqaralyq qoldanysta. Osy jerde eń kóne sózder jazylǵan.
Sondaı-aq mýzeıde myńdaǵan jádiger baryn, onyń ishinde osyǵan deıin ótken barlyq Olımpııa oıyndary men Qytaıda uıymdastyrǵan kóptegen sporttyq is-sharanyń logotıpteri men sımvoldyq sýretterin kezdestirýge bolady. Tipti Máskeý Olımpıadasynyń barlyq fotolary men urandary jazylǵan gazetter de bar.
Azııa oıyndary logıtıpiniń avtory «Song Jianming» barlyq sport túrleriniń logotıpi qalaı jasalǵany jóninde aqparat berip, olardyń túpnusqasy osynda saqtalǵanyn aıtty.