4 qazanda Astanada «Aǵza donorlyǵy kúni: ómirdi qutqarý shyndyqqa aınalady» taqyrybynda brıfıng ótti, dep habarlaıdy Egemen.kz.
Brıfıngte «Astana qalasynyń qoǵamdyq densaýlyq saqtaý basqarmasy» MM basshysynyń orynbasary Gúlnaz Dosmyrzaeva men Transplanttaýdy jáne joǵary tehnologııalyq medısınalyq qyzmetti úılestirý jónindegi respýblıkalyq ortalyqtyń qoǵammen baılanys mamany Jánibek Zeıneluly Qazaqstandaǵy donorlyq pen transplantasııanyń damý erekshelikteri, jalpy elimizde onyń ishinde Astana qalasy boıynsha transplantasııany kútip júrgen naýqastardyń sany, sondaı-aq Ashyq esik kúniniń maqsat-mindetteri týraly baıandady.
Aǵzany transplantasııalaý – mańyzdy medısınalyq jetistik, biraq donorlyq organdarǵa suranys usynystan asyp túsedi.
Málimetterge sáıkes, 2022 jyly tek 4 máıittik donor 16 adamnyń ómirin saqtap qalǵan, al 2023 jyly 4 máıittik donor 9 adamnyń ómirin jalǵastyrýǵa úmit syılaǵan.
Bıylǵy 10 qyrkúıektegi kórsetkish boıynsha, «Kútý paraǵy» tiziminde 3 953 naýqas bar, onyń ishinde búırek, baýyr, ókpe, júrek jáne «júrek-ókpe» keshenine zárý adamdar bar.
Eýropalyq aǵza donory kúni aıasynda Transplanttaýdy jáne joǵary tehnologııalyq medısınalyq qyzmetti úılestirý jónindegi respýblıkalyq ortalyq Ulttyq ǵylymı onkologııalyq ortalyqpen birlese otyryp, bıyl 7 qazan kúni saǵat 9:00-den 13:00-ge deıin Kereı-Jánibek handar 3 mekenjaıy boıynsha Ashyq esik kúni sharasyn ótkizedi. Azamattardy qabyldaýdy bilikti onkolog-dárigerler, hırýrgtar, transplantologtary júrgizedi.
Transplanttaýdy jáne joǵary tehnologııalyq medısınalyq qyzmetti úılestirý jónindegi respýblıkalyq ortalyqtyń transplantasııa úılestirýshisi qaıtys bolǵannan keıin organdardyń donorlyǵyna nıet bildirý týraly, Kútý paraǵyn qurý jáne júrgizý máseleleri boıynsha, sondaı-aq týystyq aǵza donorlyǵy máseleleri boıynsha keńester beredi.
Ýchaskelik dárigerdiń joldamasy talap etilmeıdi. Kelýshiniń ózimen birge jeke kýáligi men medısınalyq qujattary (zerthanalyq zertteýlerdiń buryn alynǵan nátıjeleri, aspaptyq/sáýlelik dıagnostıkanyń qorytyndysy, úzindi kóshirmeler jáne t.b.) bolǵany jón.
Konsýltasııaǵa jazylý úshin myna nómirge habarlasyńyz: +7 7172 702 911, 702 900.
Eýropalyq aǵza donorynyń kúnine oraı Qazaqstanda bıyl 9 qazanda Donor kúni atap ótiledi.