Atyraý óńiri ákim saılaýyna daıyn

Aımaqta ótken jıynǵa Or­ta­lyq saılaý komıssııa múshesi Shavhat О́temisov pen OSK apparatynyń jaýapty qyz­met­kerleri qatysty. Sapar­dyń alǵashqy kúni Nurlan Ábdirov S.О́tebaev atyndaǵy Atyraý munaı jáne gaz ýnıversıtetiniń stýdentterimen kezdesti. Ol eli­mizdiń saılaý júıesinde bas­talǵan saıası reformalar týraly keńinen áńgimeledi.

Atyraý oblystyq máslıha­tynyń sheshimimen Isa­taı, Qyzyl­qoǵa aýdan­darynda ákimdi tikeleı saılaý alǵash ret ótkiziledi. Osyǵan oraı Ortalyq saılaý komıssııasynyń basshysy Qamysqala aýyldyq okrýginiń turǵyndarymen kezdesý ótkizý úshin Isataı aýdanyna at basyn tiredi. Ol birinshi kezekte, aýyl turǵyndarynyń buryn saılanǵan aýyl ákiminiń atqarǵan jumysynyń sapasy týraly pikirlerin tyńdady. Aýyl turǵyndary onyń qyzmetine oń baǵa berdi. Turǵyndar aýyl ákimi Rafıǵat Tájıdenovanyń 2021 jyly Atyraý oblystyq «Úzdik aýyl ákimi» baıqaýynda jeńiske jetkenin de atap ótti. Aýyldaǵy Ardagerler keńesiniń tóraǵasy Bekbolat Mýsınniń pikirinshe, ákimniń jumysy nátıjeli bolýy úshin qoldanystaǵy bıýd­jetaralyq qatynastardy jetil­dirý arqyly ákimniń qarjylyq derbestigin arttyrý qajet, bul óz kezeginde Prezı­dent Qasym-Jomart Toqaevtyń 2023 jylǵy 1 qyrkúıektegi Qazaqstan halqy­na Joldaýymen sáıkes keledi.

Isataı aýdanynyń ortalyǵy Aq­qys­taý aýylynda jastarmen kezdesý de mazmundy ótti. Jastar ózderin tol­ǵan­dyryp júrgen suraqtaryn qoı­dy. Máselen, jas bel­sendi Erkebulan Zınedınov destrýktıvti dinı aǵymdar­dyń yqpalyna qarsy turý maqsatynda turǵyndardyń ımamdardy saılaýy týraly máseleni kóterdi. Jas kásipker Arsen Smaıylov, elimiz boıynsha elektrondyq daýys berýdi engizýdi usyndy, bul qadam saı­laýǵa qatysýdy arttyrý múmkin ekenin paıymdady.

Sondaı-aq OSK tóraǵasy Qyzyl­qoǵa aýdany Muqyr aýylyndaǵy №159 ýchas­kelik saılaý komıssııasynyń ju­my­symen tanysty. Muqyr aýyldyq ok­rý­gi ákiminiń qatysýymen aýyl tu­rǵyn­darymen dástúrli kezdesý ótkizip, aldaǵy saılaý naýqanynyń mańyz­dy­lyǵyn atap ótti. Turǵyndar saılan­ǵan ákimniń jumysyna kóńili tolatynyn jetkizdi. Aýyl turǵyny, 93 jastaǵy aq­saqal О́tegen Orash kóp jumys atqa­ryl­ǵanyn, biraq aýyldy odan ári birge damytý­dy jalǵastyrý qajetin aıt­ty. Al zeınetker Aqnıet Sahı­diń piki­rinshe, ákim eń aldymen ádil, adal, eńbek­qor bolýy jáne halyq aldynda ber­gen ýáde­sin tolyq oryndaýy kerek. Bilim berý salasynyń ardageri, qoǵam­dyq bastamadaǵy medıator Qazıma Kemel­qyzy aýdan ákiminiń saılaýynda aýyldastaryn kandıdattardyń saılaýaldy baǵdarlamalaryn muqııat zerdelegennen keıin ǵana belgili bir kandıdatqa daýys berýge shaqyrdy.

Ortalyq saılaý komıssııa­synyń tóraǵasy Nurlan Ábdirov Mııaly aýy­lynda jergilikti saılaý komıssııa­la­rynyń aldaǵy saılaýǵa daıyndyq barysymen tanysty, sondaı-aq №144 saılaý ýchaskesine bardy.

Qyzylqoǵa aýdanynyń orta­ly­ǵynda aýyl jastarymen qyzyqty kezdesý ótti. Nurlan Májıtuly ótken jáne aldaǵy saılaý naýqandary, saılaýdy halyqaralyq baıqaý, daýys berýdiń balamaly tásilderi jáne olardy qoldanýdyń sheteldik tájirıbesi týraly aıtyp berdi. Atyraý qalasynyń stýdentteri arasynda ótkizilgendeı osy kez­desýde de elektrondyq saýal­dama júrgizildi. Osy eki saýaldamanyń nátıjeleri jalpy uqsas boldy.

Kezdesý barysynda jas aýyl tur­ǵyn­dary saılaý júıesiniń túrli máse­le­leri tóńireginde qyzý áńgime órbit­ti. Mysaly, Jas­tar ortalyǵynyń qyz­met­keri Rızabek Amantaı merziminen buryn daýys berý ınstıtýtyn engizý múm­kin­digine, al jas jýrnalıst Aısáýle Ardaq­qyzy daýys berý úderisin sıfrlan­dyrýǵa, saılaýda elektrondyq daýys berýdi engizýge qyzyǵýshylyq tanytty. Kezdesýge qatysýshylar saılanatyn aýdan ákimi qandaı qasıetterge ıe bolý qajettigi jaıynda da óz pikirlerin bildirdi. Jastarmen jumys jónindegi mamandar – Altyngúl Aıtqalıeva men Aıdana Ospan joǵary biliminiń, jetkilikti jumys tájirıbesiniń bolýyna, sondaı-aq jergilikti qoǵamdastyqpen óza­ra is-qımyl jasaý qabiletine toqtaldy. Qarjy mamany Dýman Nyǵ­metov pen kásipkerlik bóli­miniń qyzmetkeri Oralbek Otarbaı halyqpen jáne jastarmen tıimdi keri baılanys, onyń ishinde áleýmettik jelilerdegi baılanys daǵdylaryn bólip kórsetti. Dýlat Báıdibek ákim jer­gilikti turǵyndardy jumys­pen qamtamasyz etýge qabileti bolýǵa tıis dedi.

Sondaı-aq N.Ábdirovtiń tóraǵa­lyǵymen keńes ótip, oǵan oblystyq, Isataı jáne Qyzylqoǵa aýdandarynyń saılaý komıssııalarynyń, jergilikti atqarýshy jáne quqyq qorǵaý organdary­nyń basshylary qatysty. Tóraǵa aldaǵy saılaýǵa daıyndyq týraly baıandama jasa­dy. OSK basshysy aýdan ákim­derin saılaý erekshe ekenin, jergilikti saılaý, atqarý­shy jáne quqyq qorǵaý organdaryna úlken jaýapkershilik júk­teıtinin jetkizdi. Ol ákim­dik­ke jáne aýmaqtyq saılaý komıs­sııalaryna múge­dektigi bar azamattardyń saılaý quqyq­taryn qamtamasyz etý, kandı­dattarǵa úgittik baspa materıal­daryn ornalastyrý úshin jetki­likti oryn berý, barlyq uıym­das­tyrý máselelerin jedel sheshý jóninde keshendi sharalar qabyldaýdy tapsyrdy.

Atyraý oblysy