Aqtóbede estý múmkindigi shekteýli qyzdar arasynda «Sáýkeleli arý –2023» sulýlyq konkýrsy ótti. Oǵan elimizdiń Astana, Almaty, Aqtaý, Atyraý, Oral jáne Aqtóbe qalalary jáne Tatarstan, Qyrǵyzstannan kelgen on bes boıjetken qatysty. Baıqaýdyń basty maqsaty – qazaq halqynyń ulttyq kıimderin, ásirese sáýkeleni nasıhattaý bolatyn.
Bul – ekinshi jyl ótkizilip otyrǵan saıys. Byltyrǵyǵa qaraǵanda katysýshylar qatary kóbirek bolǵanyn atap ótken jón. Báıge barysynda úmitkerlerdiń syrtqy sulýlyǵy ǵana emes, ultynyń salt-dástúri, ádet-ǵurpy, tarıhy men mádenıeti, ádebıetin bilýi jáne jeke ónerin kórsete alýy jarystyń negizgi shartyna aınaldy. Árıne estý múmkindigi shekteýli boıjetkenderge osyndaı qatal synnan ótý ońaı emes. Soǵan qaramastan arýlar alýan túrli úlgide asa talǵammen tigilgen ulttyq kıimderimen jáne tabıǵı sulýlyqtarymen qazylar alqasynyń nazaryn aýdardy.
Baıqaý qorytyndysy boıynsha «Sáýkeleli arý – 2023» júldesine atyraýlyq boıjetken Qarakóz Murat laıyq dep tanyldy. Júldeli I oryndy Aqtóbeniń boıjetkeni Gúlden Ýáıisova, II oryndy Bishkek qalasynan kelgen Elzıra Mırlanqyzy, III oryndy astanalyq Aızada Jaýǵashtına ıelendi. Bul joly Aqtóbege baıqaýǵa kelgen qyzdardyń eshqaısysy qur ketken joq. Uıymdastyrýshylar qatysqandardyń barlyǵyna arnaıy syı taǵaıyndady. Aıta ketý kerek, sándi sáýkelemen qosa tal boılaryna jarasqan ulttyq kıimderdiń úlgisin qyzdar ózderi tikken.
Aqtóbe