Sońǵy úsh aıda Túrkııanyń Alanııa qalasynda 6 otandasymyz jol apatyna ushyrap, kóz jumdy, dep habarlaıdy Egemen.kz.
Eske salsaq, qaıǵyly apattyń biri 13 qazanda boldy. Syrtqy ister mınıstrligi Túrkııanyń Alanııa qalasynda taǵy bir Qazaqstan azamatynyń kólik apatynan kóz jumǵanyn málim etti. Sýyt habar týraly kóz jumǵan kelinshektiń aǵasy Facebook-te jazba qaldyrǵan edi.
«13 qazanda qaryndasymyz Álııa Qulmaǵambetovadan aıyrylyp qaldyq. Jasy nebári 38-de edi. Onyń jospary kóp bolatyn. Ony Alanııanyń Kestel aýdanyndaǵy (Túrkııa) D 400 tasjolynda avtokólik qaǵyp ketti. Polısııanyń aıtýynsha, ol joldy belgilengen bólikten, baǵdarshamnyń jasyl túsi janǵan kezde kesip ótken. Tergeý jumystary júrip jatyr. Kólik tizgininde jas qyz bolǵany belgili boldy. Ony oqıǵanyń anyq-qanyǵyn anyqtaǵansha úıine jiberdi. Buǵan deıin Álııa osyndaı jol-kólik oqıǵasyna kýá bolǵan edi. Tipti ol týraly chatqa da jazǵan. Sondyqtan biz polısııa aıtyp otyrǵan nusqanyń durystyǵyna senemiz. Qaryndasym joldy erejege saı kesip ótken. Túrik baýyrlar tergeýdi ádil júrgizedi dep úmittenemiz», dep jazdy marqumnyń aǵasy.
«Ajal jolyndaǵy» taǵy bir qaıǵyly oqıǵa 30 shilde kúni bolǵan edi. Ol kezde Qazaqstannyń 12 azamaty mingen shaǵyn avtobýs jol-kólik oqıǵasyna ushyraǵan. Aldyn-ala málimet boıynsha, avtobýs júrgizýshisi joǵary jyldamdyqpen kele jatyp júk kóligin soqqan. Qaqtyǵys saldarynan 12 Qazaqstan azamatynyń ekeýi aýyrlyǵy ortasha jaraqat alǵan. Olarǵa ota jasalyp, barlyq qajetti medısınalyq kómek kórsetilgenmen olar ókinishke qaraı, kóz jumdy.
Taǵy bir jol apaty 3 qyrkúıekte boldy. Ol kezde 1989 jyly týǵan qazaq jýrnalısi Araılym Baǵytjan men onyń 2 jasar qyzy oqıǵa ornynda jan tapsyrǵan edi. Araılym Baǵytjannyń 1986 jyly týǵan joldasy aýrýhanaǵa jetkizilip, jansaqtaý bólimine jatqyzyldy. 7 qyrkúıek kúni ol jansaqtaý bóliminde kóz jumdy. Olardyń 2014 jyly týǵan balasy aman qaldy.
Bul trassada kóbine TMD elderinen kelgender ajal qushady. Sebebi bul memleketterde jaıaý júrginshi jolaǵynan ótip bara jatqan adamdarǵa únemi jol beriledi.