Qostanaı oblystyq tarıhı-ólketaný mýzeıinde Antropomorfty tas músinniń beınesi saqtalǵan. Bul mýzeıdiń arheologııalyq toptamasyndaǵy jurt qyzyǵyp kóretin eksponattardyń biri.
Tas músin mýzeıge 1986 jyly tapsyrylǵan. Ol Qostanaı qalasynyń mańyndaǵy Qyzyl partızan keńsharynyń aýmaǵynan tabylǵan. Aıtpaqshy, 1976 jyly dál osy tóńirekten arheologııa ǵylymyndaǵy tyń jańalyqtyń biri sanalǵan «Tobyl oıshyly» da tabylǵan edi. Músin aqshyl sary tústi iri túıirshikti qumtastan qashaý jáne tegisteý tehnıkasymen jasalǵan. Bıiktigi – 19 santımetr. Ǵalymdar ony eneolıt dáýirinde jasalǵan dep joramaldaıdy. Iаǵnı bizdiń zamanymyzǵa deıingi III myńjyldyqtyń sońy men II myńjyldyqtyń bas kezine sáıkes keledi. Músinniń beti syzylmaǵan, jaǵy jaılap keýdeniń joǵary jaǵyna ulasady, tek ıegi ǵana alǵa shyǵyp tur. Aýzy shyǵyńqy beder emes, oıylǵan syzyqpen kórsetilgen. Denesiniń aldyńǵy bóligi óńdelmegen jáne eshqandaı oıyǵy joq. Dóńgelengen arqasy eptep óńdelgen. Qoly men aıaǵy bederlenip berilgen. Músin ornyqty, biraq tik osten sál aýytqyǵan.