Senatta ulttyq mereke – Respýblıka kúnine arnalǵan saltanatty jıyn ótti. Is-shara barysynda Palata Tóraǵasy Máýlen Áshimbaev 1990 jylǵy 25 qazanda qabyldanǵan Egemendik týraly deklarasııanyń tarıhı mańyzyna toqtalyp, atalǵan qujat Qazaqstan táýelsizdiginiń negizi bolǵanyn atap ótti, dep habarlaıdy Egemen.kz Senattyń baspasóz qyzmetine silteme jasap.
«Egemendik týraly Deklarasııa qabyldanǵan data elimiz úshin tarıhı kún. Bul elimizdiń erkindik jolynda jasaǵan asa mańyzdy qadamy boldy. Sol sebepti, osy kúndi mereke retinde qaıta qalpyna keltirip, oǵan ulttyq mártebe berýdi tarıhı ádilettiliktiń jarqyn kórinisi dep qabyldaımyz. Deklarasııaǵa sáıkes Qazaqstan ózin halyqaralyq quqyqtyń derbes sýbektisi retinde bekitti. Qujatta el terrıtorııasynyń tutastyǵy, oǵan qol suǵylmaıtyndyǵy týraly strategııalyq norma da naqty belgilendi. Sondaı-aq elimiz demokratııalyq quqyqtyq memleket qurý jolymen júretinin málimdedi», dedi Máýlen Áshimbaev.
Sonymen qatar Senat Tóraǵasy elimizde Memleket basshysynyń bastamasymen Ádiletti Qazaqstan qurý baǵytynda iske asyrylyp jatqan reformalarǵa nazar aýdardy. Onyń ishinde ekonomıkalyq saıasattyń jańa úlgisin qalyptastyrýdyń mańyzdy ekenine basa mán berdi.
«Senat Prezıdentimizdiń bastamasymen qolǵa alynǵan jáne elimizdi odan ári jańǵyrtýǵa arnalǵan reformalardy zańnamalyq turǵyda qamtamasyz etý úshin júıeli jumys júrgizip keledi. Qazirgi tańda aldymyzda turǵan basty mindetterimizdiń biri – ekonomıkalyq saıasattyń jańa modelin qalyptastyrý. Memleket basshysy óz Joldaýynda bul saladaǵy negizgi baǵdardy belgilep berdi. Soǵan sáıkes zań shyǵarý qyzmetinde osy baǵytqa basymdyq beremiz. Munyń bári barshamyzdyń ortaq maqsatymyz – Ádiletti Qazaqstan qurý jolyndaǵy mańyzdy qadamdar», degen Máýlen Áshimbaev Senat depýtattary men Apparat qyzmetkerleri bul salada úılesimdi jumys istep kele jatqanyn tilge tıek etti.
Is-shara barysynda Senat Spıkeri qatysýshylardy merekemen quttyqtap, birqatar senator men Apparat qyzmetkerine memlekettik nagradalardy tapsyrdy.
Bıyl Memleket basshysynyń Jarlyǵymen senatorlar Álı Bektaev II dárejeli «Barys» ordenimen, Aqmaral Álnazarova, Lázzat Qaltaeva jáne Bekbolat Orynbekov «Parasat» ordenimen marapattaldy.
Sondaı-aq taǵy bir top senatorlarǵa jáne apparat qyzmetkerlerine memlekettik nagradalar jáne halyqaralyq parlamentaralyq uıymdardyń marapattary saltanatty túrde tapsyryldy.