Baq saıasyndaǵy baldyrǵandar

Kórikti kelbeti talaıdy tamsantqan Jalańash aýylyndaǵy Kegen aýdany boıynsha tehnıkalyq, shyǵarmashylyq jáne kásibı baǵdar berý ortalyǵynyń beıneleý óneri úıirmesine bul kúni mektep oqýshylarynyń qyzyǵýshylyǵy arta túsken. Oǵan san boıaýly ónerdi súıý men ony túsinýge degen talpynystary sebep.

«Álemde baıqampaz eki top bar, biri – sýretshi, ekinshisi – bala» degen. Ekeýi de bir obektige qaraıdy. Nege olaı, nege bu­laı dep zertteıdi. Bilmegenin suraı­dy, izdenedi. Osy zerdeleý olardyń logıkalyq oılaý júıesin damytady. Ata-analar, ustazdar osy júıeniń ári qaraı óris­teýine jol ashýy kerek. Este saqtaý qabi­letin damytýdyń joly óleń jattaý bolsa, kásiptik baǵyttaǵy talantyn ashý  shy­damdylyq pen izdenisti, eńbekti qajet etedi», degen ulaǵaty mol ustaz Bolat Sársenbaı shákirtterin árdaıym taban­dylyqqa, tabysty bolýǵa baýlyp keledi.

Búginde ózinen tálim alyp júrgen 30-dan astam baldyrǵannyń talantyn ashyp, sýretshilik sheberligin shyńdaý nátıjesinde olardyń 20-ǵa jýy­ǵy res­pýblıkalyq kórkemsýret baı­qaý­laryna qatysyp, 4-eýi bas júlde ıelengenin aıryqsha ataǵymyz keledi.

Jalpy, ónerge qushtar oqýshylardyń arasynda úzdikter kóptep kezdesetinin áńgime arqaýy etken Bolat Japsarbaıuly Fınlıandııada oqýshylardyń deni qosymsha bilimmen qamtamasyz etiletindigin, sonyń arqasynda ár fın azamatynyń san qyrly talanty ashylyp, tulǵalyq qasıetke ıe bola­tyndyǵyn tilge tıek ete kele, mun­daı múmkindikten aýyl balalary shet qalma­ǵandyǵyn atap ótti.

«Bolam degen balanyń betin qaqpa, belin bý» degen danalyqty temirqazyq etken sýretshi-ustaz táýelsiz elimizdiń talantty ul-qyzdarynyń qııalyna qanat bitirýmen qatar, sýretshilik ónerdiń qyr-sy­ryna qanyǵýyna barynsha yqpal etip keledi. Balǵyn sýretshilerdi tabı­ǵat tósine shyǵaryp, ushqan qus, terbelgen gúldiń qımyl-qozǵalysy men aýyl­dyń tynys-tirshiligin qalt jibermeı, qaǵaz be­tinde órnekteýge úıretýden jalyq­paıdy. 

Almaty oblysy