Kostenko atyndaǵy shahtadaǵy órtten qaza tapqan kenshiler sany artty. Qaraǵandy oblysy ákimdigi baspasóz qyzmeti taratqan málimetke sáıkes 32 adam qaıtys boldy, dep habarlaıdy Egemen.kz.
«Saǵat 16:00-degi jaǵdaı boıynsha 32 adamnyń máıiti tabyldy, 14 kenshi áli de izdestirilip jatyr», delingen habarlamada.
«ArselorMıttalTemirtaý» AQ Kómir departamentiniń Kostenko atyndaǵy shahtadaǵy avarııalyq-qutqarý jumystaryna «Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby» JShS Qaraǵandy fılıalynyń taý-ken qutqarýshylary jumyldyryldy.
Gaz jaǵdaıyn baqylaý, synamalardy alý, sondaı-aq tabylǵan máıitterdi shyǵarý jumystary júrgizilip jatyr. «ArselorMıttal Temirtaý» AQ kómir departamenti shahtalarynyń jumysy bir táýlikke toqtatyldy. Osy ýaqyt ishinde gazdan qorǵaý qurylǵylary tekseriledi.
Eske salaıyq, «ArselorMıttal Temirtaý» AQ-ǵa qarasty Kostenko shahtasynan órt shyqty. Prezıdent Úkimetke «ArselorMıttalTemirtaý» kompanııasymen ınvestısııalyq yntymaqtastyqty toqtatýdy tapsyrdy. Bas Prokýratýra atalǵan iske qatysty sotqa deıingi tergep-tekserýdi bastady. Memleket basshysynyń tapsyrmasyna sáıkes Premer-mınıstr Álıhan Smaıylovtyń tóraǵalyǵymen Qaraǵandy oblysynda «ArselorMıttal Temirtaý» AQ-nyń Kostenko atyndaǵy shahtasynda oryn alǵan apattyń sebepterin tergeý jáne onyń saldaryn joıý jónindegi Úkimettik komıssııa quryldy. Memleket basshysy Qasym-Jomart Toqaev apattyń mán-jaıyn anyqtap, tıisti sheshim qabyldaý úshin Qaraǵandy oblysyndaǵy qaıǵyly oqıǵa oryn alǵan jerge bardy. 29 qazan elimizde Jalpyulttyq aza tutý kúni dep jarııalandy.