Apta basynda oblys ákimi Nurlybek Nálibaevtyń tóraǵalyǵymen gaz tapshylyǵyna baılanysty májilis ótti. Aımaq basshysy tómen baǵamen beriletin gazdy kásipkerlerge qymbattatyp satqan operatorlardy qatań synǵa aldy.
– Úkimet halyq úshin arzan baǵamen gaz beredi. Al sizder sony syrtqa satyp, paıda tabasyzdar. Arzandatylǵan gazdy halyqtyń aýzynan jyryp, qymbatqa satýǵa jol bermeımiz, – dedi aımaq basshysy.
Qazir oblys ortalyǵy men aýdandarda komıssııa qurylyp, áleýmettik gazdyń turǵyndarǵa ashyq jáne ádil taratylýyn qadaǵalap otyr. Munan bólek, oblystyń Túrkistan, Aqtóbe, Jezqazǵanmen shekarasyna arnaıy beketter qoıylyp, áleýmettik gazdy tasymaldaý qatań baqylaýǵa alyndy. Bul top gazdy tıep-jóneltýden bastap, tutynýshyǵa satýǵa deıin baqylaý jasaıdy.
Básekelestikti qorǵaý jáne damytý agenttigi tóraǵasynyń 2022 jylǵy 5 shildedegi №16 buıryǵymen Qyzylorda oblysynyń aýmaǵyndaǵy avtogaz quıý stansalarynda suıytylǵan munaı gazyn bólshek saýdada ótkizýdiń shekti baǵalary bekitilgen.
Búgingi kúni oblysta suıytylǵan munaı gazy qory – 221 tonna. Qazannyń jıyrma jetisinde qosymsha taǵy 224 tonna bólindi. Osy qarasha aıyna 7 458 tonna suıyq gaz qarastyrylǵan. Onyń 4 740 tonnasy «Qazgermunaı» kompanııasynan bólinip, birinshi onkúndikte 1 840 tonnasy josparǵa sáıkes jetkiziledi.
Májilis qorytyndysynda barlyq operatorǵa gazdy satýǵa qatysty shekteýlerdi alyp tastaý qatań tapsyryldy.