Sap-saý júrgen balam bir kúnde sal bolyp qaldy. "Astana" telearnasyna habarlasqan jalǵyzbasty ana osylaı degen. Sport úıirmesine ketken 14 jastaǵy jetkinshek úıine aýyr jaraqatpen qaıtqan, dep habarlaıdy Egemen.kz.
Jattyǵý kezinde bir jasóspirimniń aıaǵy ekinshisiniń basyna tıip, balanyń oń jaq beti istemeı qalǵan.
Aıjan Seıitbekova – ekinshi toptaǵy múgedek. Jalǵyzbasty ana. Aǵjan - onyń jalǵyz uly. Jasóspirim sportty jaqsy kóredi. Buǵan deıin qalalyq deńgeıdegi jarystarǵa qatysyp, júlde ıelengen. Aıjan jattyǵýdan qalmaı baratyn balasynyń bir kúnde múgedekke aınalǵanyn aıtyp qynjylady.
"Bas súıegin kompıýterden kórsetti. Oń jaq beti maıdalanyp ketken. Sol súıegin alyp tastap, polnyı plastıka qoıamyz deıdi. Kózdi tirep turý úshin. Basqalaı múmkin emes. Balaǵa solaı ǵana kómektese alamyz, - deıdi. Al, sport she desem, odan shetteý bolady, 1-2 jyl qatyspaıdy. Al plastık ómir baqıǵa qalady", deıdi Aǵjanyń anasy Aıjan Seıitbekova.
«Palýan» erejesiz jekpe-jek kesheninde 100-den asa bala sport úıirmesine qatysady. Balalar senbi kúni jattyǵýǵa jınalǵan. Jattyqtyrýshy olardy jup-jupqa bólip, ádis-tásilderdi kórsetedi. Ol kezde Aǵjan men janyndaǵy dosynyń basynda «shlem» bolmaǵan. Trener erejelerdiń saqtalmaǵanyn kórip ekeýine eskertý jasap, «tebýge bolmaıdy» dep shart qoıady.
"Biraq olar meniń sózimdi tyńdamady.
Bul kezde men basqa balalarmen jumys istep jatqanmyn. Jattyǵý kezinde bolsyn, jarysta bolsyn, bizde jaraqat bolady. Sport bolǵannan keıin onsyz bolmaıdy. Biraq men ár jaraqatqa, deneniń kógerýine jedel járdem shaqyrmaımyn ǵoı. Tek bir jeri synsa, shyǵyp ketse júginemin. Sosyn úıine demalýǵa jiberdim. Men sabaq bastalar aldynda balalarǵa eskerttim. Olar tyńdamady", deıdi jattyqtyrýshy Samat Rahmetov.
Qazir balanyń jaǵdaıy birqalypty. Jasóspirimniń oń jaq betine zaqym kelgen. Jaqynda operasııa jasalady. Oqıǵadan keıin jetkinshektiń anasy polısııaǵa aryzdanǵan.
"Jattyǵý kezinde jattyǵýshylardyń biri qarsylasynyń kóz aımaǵynan tepkeni anyqtaldy. Atalǵan fakti boıynsha sot-medısınalyq saraptama taǵaıyndaldy. Qorytyndysy boıynsha QR qoldanystaǵy zańnamasyna sáıkes sheshim qabyldanady", dedi Astana qalalyq PD baspasóz qyzmetinen.