Almatynyń "Keńsaı-1" jáne "Keńsaı-2" zırattarynda birneshe ret ǵuryptyq kerek-jaraqtar, qorshaýlar, mármár eskertkishter men jıektastar urlanǵan, dep habarlaıdy Egemen.kz.
Almatydaǵy Keńsaı zıratynda qaýipsizdik sharalary kúsheıtildi, mundaı sharalar KSRO Halyq ártisteri - kompozıtor Ǵazıza Jubanova men rejısser Ázirbaıjan Mámbetovtyń qabirlerin tonaǵannan keıin qabyldanǵan. Bul týraly Almaty ákimdiginiń baspasóz qyzmeti málim etti.
"Vandalızm, ǵuryptyq kerek-jaraqtardy, qorshaýlardy, mármár eskertkishter men jıektastar "Keńsaı-1" jáne "Keńsaı-2" zırattarynda urlanýda. Qalǵan zırattarda mundaı faktiler birdi-ekili ǵana nemese múlde tirkelmegen. Zırat qyzmetkerleri birneshe ret urlyqtyń jolyn kesip, qylmyskerdi ustap, polısııa qyzmetkerlerine tapsyrdy", - dep habarlady ákimdiktiń baspasóz qyzmeti.
Medeý aýdanynyń polısııa basqarmasy janyndaǵy polısııa bóliminiń málimetinshe, jyl basynan beri "Keńsaı" zıratynda urlyq jasady, ıaǵnı QR QK 188-baby boıynsha bótenniń múlkin urlady degen kúdikpen úsh adam ustalǵan.
"Urlyqshynyń zatyn satyp alýshy da ustalyp, qylmystyq jaýapqa tartyldy, jedel is-sharalar kórsetkendeı, ol qylmystyq jolmen alynǵanyn bile tura qaskúnemniń zırattan alynǵan múlkin únemi satyp alyp otyrǵan. Onyń is-áreketi QR QK 196-baby 2-tarmaǵy boıynsha saralanǵan. Sonymen qatar, byltyr Almaty polıseıleri "Keńsaı" zıratynda birqatar urlyq jasady degen kúdikpen eki er adamdy ustaǵan. 1989 jyly týǵan K. esimdi jáne 1995 jyly týǵan A. esimdi azamattar 20 ret urlyq jasaǵan. Sol kezde urlanǵan múlikti satyp alýshy da qolǵa tústi, ol 1988 jyly týǵan T. esimdi azamat qaskúnemderden shoıyn qorshaýlardy satyp alyp otyrǵan", - delinedi ákimdiktiń habarlamasynda.
Búgingi kúni "Mamandandyrylǵan salttyq qyzmet kórsetý kombınaty" JShS (ary qaraı - seriktestik) "Jerleýdiń jáne zırattardy qarap-kútý jónindegi isti uıymdastyrý qaǵıdalaryna" sáıkes, qala zırattaryn kútip-ustaý (aýmaqty jınaý, qoqys pen qardy shyǵarý, aǵashtar men butalardy sanıtarlyq maqsatta kesý jáne jalpyǵa ortaq paıdalanylatyn aýmaqta qulatý) boıynsha qyzmet kórsetedi.
"Almaty qalasy máslıhatynyń 2022 jylǵy 8 maýsymdaǵy №139 jáne QR BK sheshimimen bekitilgen 3.02-141-2014 "Zırattardy jobalaý jáne kútip ustaý" erejesiniń 15.3.5 tarmaǵy boıynsha jerleýge bólingen ýchaskeniń shekarasyndaǵy beıit qurylysy - týystarynyń nemese olardy qurǵan mekemelerdiń menshigi bolyp tabylady. Demek, seriktestik múliktiń (qabir ústindegi qurylystar, qorshaýlar) saqtalýyna jaýap bermeıdi", - dep habarlady ákimdikte.
2023 jyly "Star Wolf Security" JShS kúzet qyzmetin kórsetip keledi. Kúzetke bólingen qarajat joǵaryda atalǵan zırattarǵa eki beketten ǵana eseptelgen.
"Qorǵalatyn nysandardyń jalpy aýdany 197,2 gektar bolǵandyqtan, qorǵalatyn nysannyń barlyǵyny baqylaýda ustaý múmkin emes. Joǵaryda atalǵan jaıttarǵa qaramastan, zırattar men kúzet uıymynyń qyzmetkerleri talaı ret urlyq-qarlyqtyń jolyn kesip, qylmyskerler ustalyp, polısııa qyzmetkerlerine berildi. Ákim apparaty 2024 jyly zırattardy kúzetý úshin qosymsha kúzet beketterin qosý jáne túngi ýaqytta zırattar ishinde patrýldeý úshin qarjylandyrýdy kóbeıtýdi josparlap otyr. Sonymen qatar, Almaty qalasy Jetisý aýdany ákiminiń apparaty bıyl beınemonıtorıng júıeleriniń jelisin keńeıtý jobasy aıasynda zırattar aýmaǵynda beınebaqylaý kameralaryn ornatýǵa Almaty qalasy sıfrlandyrý basqarmasyna ótinim joldady", - dep habarlady ákimdikte.
"SVM-6000" jobasy boıynsha Jetisý aýdanynda qosymsha 750 kamera ornatý kózdelgen, onyń ishinde "Keńsaı-1", "Keńsaı-2" zırattary bar. Jumys 2023 jyldyń sońyna deıin aıaqtalady dep josparlanǵan. 2024 jyly "Halyq qatysatyn bıýdjet" baǵdarlamasy aıasynda Jetisý aýdanyndaǵy zırattardyń perımetri boıynsha jalpy uzyndyǵy 3 shaqyrym qorshaýlarǵa (Raıymbek dańǵylyndaǵy ortalyq beıit, Rysqulov dańǵyly men Kemel shaǵyn aýdany, Jolymbet kóshesindegi zırat) aǵymdaǵy jóndeý jumystary josparlanǵan.