Joǵarǵy sot tóraǵasy Aslambek Merǵalıevtyń qatysýymen joǵary sot organynyń kezekti jalpy otyrysy ótti. Is-sharaǵa sot alqalarynyń tóraǵalary men sýdıalary, ǵalymdar, ǵylymı-konsýltatıvtik keńestiń músheleri, Bas prokýratýra, Memlekettik kirister komıteti men advokatýranyń ókilderi qatysty.
Kún tártibinde normatıvtik qaýlylardyń eki jobasy qabyldandy. Alǵashqy qujat – «Sottardyń zańdy tulǵalar men jeke kásipkerlerdi ońaltý jáne bankrottyq týraly zańnamany qoldanýynyń keıbir máseleleri týraly» dep atalady. Normatıvtik qaýly jobasyn Joǵarǵy sottyń sýdıalary Marına Borovık pen Botagóz Eralıeva tanystyrdy.
Qoldanystaǵy normatıvtik qaýlyda qujat mazmunynyń 50 paıyzdan kóp bóligi túzetilýge jatady. Osyǵan oraı normatıvtik qaýly qaralýǵa shyǵarylyp otyr. О́ıtkeni «Ońaltý jáne bankrottyq týraly» zańǵa 28 ret ózgeris engizilgen. Tıisinshe, bul sot tájirıbesine de óz áserin tıgizdi. Qujatta sottylyqqa, merzimderge, sotqa júginý negizderine, ádeıi bankrottyq pen sýbsıdıarlyq jaýapkershilikke, boryshker men ákimshiniń quqyqtyq jaǵdaıyna, kredıtorlar jınalysy men komıtetine, olardyń quqyqtary men mindetterine, kredıtorlar talaptarynyń tizilimin júrgizýge jáne basqalarǵa qatysty materıaldyq jáne úderistik quqyq normalarynyń jekelegen erejeleri túsindirildi.
«Sottardyń tórelik zańnamany qoldanýynyń keıbir máseleleri týraly» NQ jobasyn Joǵarǵy sot sýdıalary Margarıta Odınsova men Jańyldyq Qashqynbaeva tanystyrdy. Joǵarǵy sottyń tórelik zańnamany qoldanýdyń sot praktıkasyn qorytýy sýdıalardyń tórelik pen sot arasyndaǵy quzyretti ajyratý, qamtamasyz etý sharalaryn júzege asyrý jáne dáleldemelerdi alýǵa járdemdesý, tórelik sheshimderdiń kúshin joıý, tórelik sheshimderdi taný jáne májbúrlep oryndaý máseleleri týyndaıtynyn kórsetip otyr.
Osy oraıda normatıvtik qaýlylar jobasynda kórsetilgen árbir jaǵdaı boıynsha túsindirme berildi. Talqylaý qorytyndysy boıynsha Joǵarǵy sot sýdıalary normatıvtik qaýlylardyń jobalaryn qabyldaý úshin daýys berdi. Jobalarmen Joǵarǵy sot saıtynyń «Zańnama» bóliminde tanysýǵa bolady. Normatıvtik qaýlylardyń mátini Qazaqstan Respýblıkasy normatıvtik quqyqtyq aktileriniń etalondyq baqylaý bankinde resmı jarııalanady.
Jalpy otyrystyń jumysyna Joǵarǵy sot janyndaǵy Halyqaralyq keńestiń múshesi, Ulttyq ǵylym akademııasynyń akademıgi, professor Maıdan Súleımenov jáne ǵylymı-konsýltatıvtik keńestiń múshesi, ekonomıka ǵylymdarynyń doktory Jannat Ertilesova qatysyp, saraptamalyq súıemeldeý qyzmetin kórsetti. Jıynda Aslambek Merǵalıev sot qyzmetin jetildirýge qosqan úlesi úshin olardy «Qazaqstan Respýblıkasynyń sot júıesine 30 jyl» mereıtoılyq medalimen marapattady.