Krasnoıar selosynyń janyndaǵy «Qulager» atshabarynda ataqty búrkitshi Másip Batyrhanulyn eske alýǵa arnalǵan qusbegiler saıysy bolyp ótti.
Jalpaq jurt súısine tamashalap, qyzyǵyna qanatyn qusbegiler saıysy bizdiń óńirde osymen jıyrmasynshy ret uıymdastyrylyp otyr. Tabıǵaty tamyljyǵan sulý ólkede ilki zamannan beri jalǵasyp kele jatqan ultymyzdyń aqsúıek óneri qaıta jańǵyryp, keńinen qanat jaıýda. Aldymen dańqty búrkitshi Másip Batyrhanuly týraly bir aýyz sóz aıta ketelik. Búrkitshi 1940 jyly Máskeý qalasynda «KSRO ańshylyq isiniń úzdigi» tósbelgisimen marapattalǵan. Resmı marapaty osy bolǵanymen, eń ystyq yqylas halyqtyń kókireginde qaldy. Otyzynshy jyldardaǵy aqsúıek ashtyqta qusbegi qyran qusynyń arqasynda tutas bir aýyldy aman alyp qalǵan. Jalǵyz qyran qus qana emes, júırik tazy da baptaǵan. Qotan qorıtyn tekti tóbet te bosaǵasynan arylmaǵan eken. Ekinshi dúnıejúzilik soǵys kezinde ań terisinen tigilgen kıim-keshek, ań etin qan maıdanda soǵysyp jatqan jaýyngerlerge ústin-ústin jiberip, sharapatyn tıgizgen.
Osy joly Kóksheniń kógildir aspanyn aıryqsha dúbirge bólegen qusbegiler saıysyna elimizdiń on oblysynan 63 úmitker qatysty. Sondaı-aq, Qyrǵyzstan, Mońǵolııa, Qytaıdan da kelgender bar. Shet elden kelgen qusbegiler arasynda Mońǵolııada turatyn qaryndasymyz, ataqty qusbegi Aısholpan Nurǵaıypqyzy da boldy. Osydan birer jyl buryn Aısholpannyń amerıkalyq rejısser Otto Bellanyń kóshpendiler ómirinen túsirgen «Búrkitshi» fılminde basty ról oınaǵany da belgili.
Qusbegiler saıysy úsh kezeńnen turdy. 11 ıtelgi, 8 qarshyǵa, 44 búrkit baby men baǵyn synady. Zaý bıikke kóterilip, topshysymen kógildir aýany tile, quldılap kelip, jemine jaı oǵyndaı jarq etip umtylatyn qyran qustyń erligi men órligine tómende kóz salyp turyp qanyń qyzady eken. Tula boıy tegeýrindi kúsh, tektilikten turatyn osynaý darhan dalanyń daraboz qustaryn aıtqanyna kóndirip, aıdaǵanyna júrgizgen ata-babamyz da osal emes-aý shamasy. Saıystyń ekinshi kúni iriktelgen 12 qusbegi qyrandaryn túz ańyna saldy. Sarapshylardyń uıǵarymy boıynsha «Búrkit», «Itelgi», «Qarshyǵa» atalymdarynda birinshi orynǵa astanalyq Serikbek Kúntýǵan, almatylyq Seıitjan Almas, qaraǵandylyq Temiráli Tólegen ıe boldy. Jeńimpazdarǵa búrkitshi Másip Batyrhanulynyń atyndaǵy estelik syılyqtar tabys etildi.
Aqmola oblysy