«Amanat» partııasynyń «Halyqpen birge!» saılaýaldy baǵdarlamasy aıasynda 16 myń turǵyny bar 6 aýylǵa gaz qubyry tartylyp, iske qosyldy.
2019 jyly «Almaty-Taldyqorǵan» magıstraldy gaz jelisinen kógildir otyn tartý arqyly «Baqanas» avtomattandyrylǵan gaz taratý stansasy salynyp, aýdanǵa joǵary qysymdy qubyrlar júrgizile bastaǵan. Stansa qurylysy aıaqtalǵan ýaqytta gaz taratý jelileriniń bolmaýyna baılanysty kógildir otynnyń berilýi keıinge shegerilgen.
Búginde halyqtyń kópten kútken armany oryndalyp, 16 320 turǵyny bar 6 eldi mekenge – Baqanas, Mııaly, Boıaýly, Aqdala, Baqbaqty, Birlik aýyldaryna gaz berile bastady. Baqanastyń ózinde 52 shaqyrym gaz qubyry júrgizildi. Aýylda 1 300-den asa úı bolsa, qazirdiń ózinde onyń 510-y tabıǵı gazǵa qosylyp úlgerdi. Osyǵan baılanysty aýdanda saltanatty is-shara ótti.
Jıynǵa arnaıy qatysqan óńir basshysynyń orynbasary Nurjan Qudaıbergenov pen oblystyq partııa fılıaly tóraǵasynyń orynbasary Aslan Kóbentaev turǵyndardy aıtýly merekemen quttyqtap, balqashtyq turǵyndar úshin qýanyshty kún ekenin, kópten kútken gazben qamtý máselesi sheshimin tapqanyn aıryqsha atap aıtty.
«Oblysta 384 eldi mekenniń 294-i gazdandyrylady. Qazirgi ýaqytta 149 eldi meken gazdandyrylyp, nátıjesinde, 1 mıllıonnan asa adam gazǵa qol jetkizdi. Gaz turǵyn úılerdi, áleýmettik nysandardy jylytýǵa yńǵaıly, aımaqta shaǵyn jáne orta bıznestiń damýyna oń yqpalyn tıgizetini anyq», dedi N.Qudaıbergenov.
Sondaı-aq «Amanat» partııasynyń Jol kartasyna saı 2027 jylǵa deıin óńirdiń gazdandyrý deńgeıi 70 paıyzǵa jetpek.
«Aýdanda júzege asyrylýǵa tıis máselelerdi turǵyndarmen birge talqylap, usynys-tilekterin jınaǵanbyz. Solardyń biri – eldi mekenderdi gazben qamtý máselesi. Bıyl Balqash aýdanynda qarasha aıyna deıin gaz beriledi dep ýáde berilgen edi. Búgin sol sát týyp, qýanyshtaryńyzǵa ortaqtasyp otyrmyz. Tabıǵı gazben qamtamasyz etý munymen toqtamaıdy. Aldaǵy ýaqytta basqa da aýyldarǵa gaz qubyry tartylyp, oblystyń gazdandyrý kórsetkishi 70 paıyzǵa ósedi», dedi A.Kóbentaev.
Aıta ketý kerek, bıyl 18 aýyl boıynsha qurylys-montaj jumystary júrgizilip jatyr. Buǵan bıýdjetten 3,5 mlrd teńge bólingen.
Almaty oblysy