Aýmaqtyq jáne ýchaskelik referendým komıssııalary referendýmdy ótkizý barysynda ashyqtyqqa, zańdylyqqa jáne barlyq azamatqa teń jaǵdaı jasaıdy. Kezdesýde Nurlan Ábdirov naýqanǵa daıyndyq barysy men ótkizý ulttyq saılaý zańnamasyna ári bekitilgen kúntizbelik josparǵa sáıkes egjeı-tegjeı júrgizilip jatqanyn aıtty.
– Qoljetimdilikti qamtamasyz etý máseleleri – turaqty baqylaýda. Bul Ortalyq saılaý komıssııasy janyndaǵy múgedektigi bar adamdardyń saılaý quqyqtaryn qamtamasyz etý jónindegi jumys tobynyń otyrystarynda júıeli túrde qaralady. ÚEU-nyń qatysýymen saılaý ýchaskelerin monıtorıngteýden bastap, komıssııa múshelerin daıarlaýǵa jáne zamanaýı tehnologııalyq sheshimderdi engizýge deıingi keshendi sharalar júzege asyrylyp keledi. Sonymen qatar qoldanylatyn barlyq qural mindetti saraptamadan ótip, belgilengen talaptarǵa sáıkestigi qamtamasyz etiledi, – dedi N.Ábdirov.
Referendým ýchaskelerinde Braıl qarpimen jazylǵan daýys berýge arnalǵan bıýlleten trafaretteri, sondaı-aq arba paıdalanatyn azamattar úshin yńǵaıly bıiktikte ornalastyrylǵan, úlken qarippen jazylǵan aqparattyq stendter qarastyrylǵan. Qazirgi naýqannyń ereksheligi árbir referendým ýchaskesinde jańa Konstıtýsııanyń jobasy mátindik nusqasymen qatar aýdıo formatta da qoljetimdi bolady.
Turǵyndardy aqparattandyrý túrli kommýnıkasııa arnalary arqyly júzege asyrylyp jatyr. Azamattarǵa referendým týraly aqparat qamtylǵan QR kody bar derbes shaqyrý bıletteri tabystalýda. Daýys berý kúni azamattardyń daýys berýshiler tiziminde bar-joǵyn tekserý, ýaqytsha tirkeý boıynsha eki onlaın-servıs jumys isteıdi.
Búginde 5 memleket, 3 halyqaralyq uıymnan 21 baıqaýshy akkredıtteldi. Buǵan qosa taǵy 15 memleket jáne halyqaralyq uıymdar, sonyń ishinde Túrki memleketteri uıymy, Shanhaı yntymaqtastyq uıymy, Táýelsiz Memleketter Dostastyǵy Parlamentaralyq Assambleıasy, Túrki akademııasy ózderiniń akkredıtasııalaý týraly ótinimderin joldady.
Kezdesý qorytyndysynda Dýglas Brıýs Ýeık Nurlan Ábdirovke usynylǵan tolyq aqparat úshin alǵys bildirip, Mıssııanyń aldaǵy jumys jospary týraly málimet berdi.
