Foto: Air Astana
Air Astana kompanııasy Medına men Jıdda qalalarynan birneshe reıs jasaǵan:
- KC2202 reısi Aqtaý qalasyna saǵat 21:28-de qondy. Bortta 142 adam bolǵan;
- KC2208 Medına – Atyraý baǵyty boıynsha ushaq saǵat 01:19-da qonǵan. Ushaqta 145 adam bolǵan;
- KC2206 Jıdda – Atyraý baǵyty boıynsha áýe kemesi saǵat 02:50-de qonǵan. Bul áýe kemesimen 174 adam elge jetken.
- KC2204 Jıdda – Atyraý baǵyty boıynsha saǵat ushaq 03:34-te qonǵan. Atalǵan baǵyt boıynsha 179 adam elge oralǵan.
Sonymen qatar SCAT áýe kompanııasy Boeing 767 áýe kemesimen Almaty – Maskat – Almaty baǵyty boıynsha reısti jasap jatyr. Ushaqta shamamen 290 oryn bar.
Búginge deıin elimizge Taıaý Shyǵys elderinen 946 jolaýshy qaıtarylǵan.
Mınıstrlik Qazaqstan azamattaryn elge qaıtarý jumystary jalǵasatynyn málimdedi.
Eske sala keteıik, Izraıl 28 aqpan, senbi kúni tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı otyr. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Búǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
Keshe Dýbaıdan Oman arqyly 467 otandasymyz elge jetkizildi. Sonymen qatar Flydubai áýe kompanııasy Dýbaı qalasynan Astana jáne Almaty qalalaryna eki evakýasııalyq reısti oryndady. Búginge deıin elimizge Taıaý Shyǵys elderinen 946 jolaýshy qaıtarylǵan.
