Ekonomıkalyq yntymaqtastyq jáne damý uıymy (EYDU) Qazaqstan Respýblıkasynyń EYDU-nyń Qoǵamdyq adaldyq jónindegi usynymyna (OECD Recommendation on Public Integrity) qosylǵanyn resmı túrde rastady. Bul týraly tıisti hatty EYDU Bas hatshysy Mattıas Kormann Qazaqstan Respýblıkasy Memlekettik qyzmet isteri agenttigi tóraǵasynyń atyna joldady.
Atalǵan sheshim EYDU-nyń Qazaqstandaǵy qoǵamdyq adaldyq júıesi men onyń iske asyrylý tetikterine júrgizgen keshendi sholýynyń qorytyndylary jáne Uıym aıasyndaǵy barlyq rásimniń tolyq aıaqtalýy negizinde qabyldandy. Sheshim elimizdiń adaldyq, sybaılas jemqorlyqqa qarsy saıasat salasynda EYDU standarttaryn engizý jónindegi mindettemelerdi qabyldaǵanyn kórsetedi.
EYDU-nyń Qoǵamdyq adaldyq jónindegi usynymy – memlekettik basqarý júıesinde adaldyq mádenıetin qalyptastyrýǵa, sybaılas jemqorlyqqa qarsy is-qımyldyń zamanaýı tásilderin ornyqtyrýǵa baǵyttalǵan negizgi halyqaralyq qujattyń biri. Ol 13 qaǵıdatqa negizdelgen jáne memlekettik apparattyń barlyq deńgeıinde, sondaı-aq tutastaı qoǵamda adaldyqty qamtamasyz etýdiń júıeli, táýekelge baǵdarlanǵan ári konteksti eskeretin tásilderin iske asyrýdy kózdeıdi.
Bul qadam Memleket basshysy Qasym-Jomart Toqaevtyń bastamasymen júzege asyrylyp jatqan kásibı, esep beretin jáne azamattarǵa baǵdarlanǵan memlekettik apparatty qalyptastyrý jónindegi reformalardyń mańyzdy kezeńi sanalady. Qazaqstannyń EYDU usynymyna qosylýy – halyqaralyq standarttarǵa ári «Ádiletti Qazaqstan» qaǵıdattaryna saı ózgeristerdiń aıqyn kórinisi.
Memlekettik qyzmet isteri agenttigi atalǵan Usynymǵa qosylýdy memlekettik qyzmet júıesin odan ári jetildirýdiń, ádep standarttaryn kúsheıtýdiń, sybaılas jemqorlyqqa qarsy tetikterdi damytý men azamattardyń memlekettik ınstıtýttarǵa degen senimin odan ári arttyrýdyń tıimdi quraly retinde qarastyrady.
Agenttik aldaǵy ýaqytta da Memleket basshysynyń memlekettik basqarý júıesine ozyq halyqaralyq tájirıbelerdi engizý, sybaılas jemqorlyqqa múldem tózbeýshilik mádenıetin qalyptastyrý jónindegi tapsyrmalaryn turaqty túrde iske asyrýdy jalǵastyrady.
Aıta keteıik, EYDU – ekonomıkalyq jáne áleýmettik saıasat, memlekettik basqarý, sybaılas jemqorlyqqa qarsy is-qımyl jáne qoǵamdyq ınstıtýttardy damytý salalarynda halyqaralyq standarttar men usynymdar ázirleıtin bedeldi halyqaralyq uıym.