Qandalanyń dárisine ýlanyp, qaıtys bolǵan eki balanyńy ákesi Janbolat Kelmedenov dezınseksııaǵa arnalǵan preparattyń quramy anyqtalmaı jatqanyn aıtty. Ol eki birdeı balasynyń ólimine sebepshi bolǵan kórshisin keshirmeıtinin málimdedi, dep habarlaıdy Egemen.kz.
Lada.kz portalynyń jazýynsha, Janbolattyń eki jastaǵy qyzy Márııam men 10 aılyq uly Bereket qandalanyń dárisine ýlanyp, kóz jumdy. Búldirshinderdiń ákesi eskertýsiz zııankesterdi ýlap, ketip qalǵan kórshisiniń jazalanbaı, bostandyqta júrgenine narazy.
“Saraptama Aqtaýda jasalmaıtyndyqtan polısııa qyzmetkerleri onyń qorytyndysyz eshqandaı shara qoldana almaı otyr. Polısııa páterdi dárilegen preparattyń quramyn anyqtaı almaıdy. Men ádildikti talap etemin. Eki balany jer qoınyna tapsyrdyq, ońaı deısizder me? Ol áıel kámelet jasqa tolmaǵan balasy bar degen jeleýmen áli bostandyqta júr”, – deıdi Janbolat Kelmedenov.
Qaıǵyly jaǵdaı týraly aıtý qıyn bolsa da, Janbolat kópke sabaq bolsyn degen oımen bolǵan oqıǵanyń mán-jaıyn baıandap berdi.
“Keshe balalar qusty. Biz ushynyp qaldy eken dep oılap, jedel járdem shaqyrttyq. “Smekta” berý kerek degen soń dárihanaǵa baryp, dári alyp keldim. Túnde jaǵdaılary jaqsaryp, durystalǵandaı boldy. Tańǵa jaqyn men de qustym. Ábden álsirep, qol-aıaǵymyzdan ál ketip, tura almaı qaldyq. Áıelim Berekettik kógerip ketkenin aıtty. Sasqanymnan balany alyp páterden shyǵyp kettim. Keıin mundaı belgiler Márııamnan da baıqala bastady. Jedel járdemge habarlasa almaǵan soń, polısııa shaqyrdym. Polısııaǵa aıtar aryz-shaǵymym joq. Olar óz jumysyn qoldan kelgenshe atqardy. Balalardy syrtqa shyǵaryp kómektesti, jedel járdem men gaz qyzmetin shaqyrdy. Keıin olar páterden gazdyń ıisi shyǵatynyn aıtty. Biz ony sezbegenbiz”, – deıdi balalardyń ákesi.
Janbolattyń aıtýynsha, mundaı qaıǵyly jaǵdaı buǵan deıin de bolǵan kórinedi. Kórshilerdiń salǵyrttyǵynan birneshe otbasy balalarynan aıyrylǵan eken. Ol quzyrly organdardan quramynda adam ómirine qaýipti zattary bar dárilerdi satýǵa tyıym salýdy talap etedi.
Janbolattyń aıtýynsha, eger kórshisi zııankesterdi dárileıtinin eskertkende mundaı jaǵdaı bolmaıtyn edi deıdi.
“Kórshimiz de, meniń áıelim de úı turǵyndarynyń chatynda bar. Biraq páterin dárileıtini týraly bizge eskertpedi. Páter ıeleriniń kooperatıvi de bul týraly bilmegen. Páterin dárileıtinin bilgende biz úıdi bosata turatyn edik, balalarymyz janymyzda bolatyn edi. Ol eń aýyr jazaǵa laıyq dep esepteımin”, – deıdi Janbolat Kelmedenov.