Bıylǵy oqý jylynan bastap «Qazaqstan halqyna» jáne «Bilim berý salasyn turaqty damytý» qorlary «Aqtóbe oblysyndaǵy shaǵyn jınaqty aýyl mektepteriniń áleýetin sıfrlyq tehnologııalardy qoldana otyryp damytý» jobasyn qolǵa aldy. Qordan bólingen 5 mlrd teńgege aýdan ortalyqtaryndaǵy 12 tirek mektep, 134 shaǵyn jınaqty mekteptiń 386 oqý kabıneti qaıta jabdyqtalyp, alty myńnan asa aýyl balasy úzdik muǵalimderden dáris alýda. Oǵan qosymsha óńirdegi 281 aýyl mektebiniń ınternet jyldamdyǵyn jaqsartýǵa jergilikti bıýdjetten 448 mln teńge bólindi.
Bul ótken jyly qarashada bastalǵan «Bilim all» qanatqaqty jobasynyń jalǵasy. Sol ýaqytta Aqtóbedegi 35 tańdaýly ustaz 120 aýyl mektebiniń oqýshylaryna aǵylshyn, matematıka, fızıka, hımııa, bıologııa pánderinen onlaın platforma arqyly dáris júrgize bastady. Túpki maqsat – aýyl mektepterindegi bilim sapasyn jaqsartý. Osy jobanyń basynda elimizdegi orta bilim júıesi reformatorlarynyń biri Kúlásh Shámshıdınova turǵanyn aıtyp ótkenimiz jón. Ol birneshe ret Aqtóbe oblysyna kelip, Oıyl, Qobda, Hromtaý aýdandaryndaǵy «Bilim all» jobasyna qatysqan shaǵyn jınaqty mektepterdiń onlaın dáristerin baqylap, oqýshylarmen, muǵalimdermen aqyldasty. Sonymen qatar burynǵy Bilim jáne ǵylym mınıstri bolǵan Ashat Aımaǵambetov pen Sıfrlyq damý, ınnovasııa jáne aeroǵarysh ónerkásibi mınıstri Baǵdat Mýsın úsh aýdandaǵy shaǵyn jınaqty mektepterge kelip sabaqqa qatysty. Qanatqaqty jobanyń jetistigi men kemshiligin tarazylaı kele, shalǵaı eldi mekenderdegi ınternet baılanysyn jaqsartý kezek kúttirmeıtin másele ekendigi belgili boldy. О́tken jyly ınternet baılanysynyń álsizdiginen 25 aýyl mektebinde onlaın sabaqtar ótkizý qıyndyqqa tústi. Degenmen júıeli jumystyń arqasynda bıyl birneshe mektepte ınternet baılanysy qalpyna keltirildi.
Aqtóbe oblystyq bilim basqarmasynyń basshysy Jaıyq Sultannyń aıtýynsha, bul – birneshe myńdaǵan aýyl balasynyń sapaly bilim alýyna jol ashatyn joba. О́ıtkeni oblys ortalyǵyndaǵy mamandandyrylǵan mektep-ınternattar 500-den artyq bala qabyldaı almaıdy. Ekinshi jaǵynan, bıýdjet qarjysy negizinen bala sany kóp mektepterge baǵyttalady da, oqýshy sany óte az shaǵyn jınaqty mektepter nazardan tys qalyp qoıady.
Qazirde «Qazaqstan halqyna» qorynan bólingen qarajatqa shaǵyn jınaqty mektepterdiń qazaq tilinen bastap alǵashqy áskerı daıyndyq pánine deıingi barlyq kabıneti, bastaýysh synyptar, kitaphana men ashana, májilis zaldary qaıta jabdyqtalyp jatyr. On eki tirek mektepte ART stýdııa, kınostýdııa kabıneti ashyldy, mýzyka kabınetterine qazaqtyń ulttyq aspaptary qoıyldy. Sonymen qatar «Qazaqstan halqyna» qory densaýlyǵynda kináraty bar balalarǵa arnalǵan Aqtóbedegi tórt mekemeniń materıaldyq-tehnıkalyq bazasyn jańǵyrtýǵa kiristi. Búginde №7 arnaıy túzetý mektebiniń bes oqý kabıneti, oblystyq arnaıy mektep-balabaqsha, Jaısań arnaıy bilim berý uıymy, oblystyq arnaıy mektep-ınternat, kolledjiniń oqý kabınetteri, sheberhanasy tolyq jańartylyp, jańa jıhazdar satyp alyndy», deıdi Jaıyq Sultan.
Zamanaýı bilim resýrstaryna qoly jetken jeti myńǵa jýyq aýyl balasyna sabaq beretin ustazdar sany osy kúni 132-ge jetti. Olardyń qataryna Zoom platformasy arqyly dárister ótkizýge aýyl muǵalimderi de qosyldy. Úırete júrip, úırený ádisi aýyldyń jas muǵalimderi úshin óte tıimdi boldy. Olar jyl saıyn oblystyq, respýblıkalyq pándik Olımpıada jeńimpazdaryn daıarlap júrgen áriptesterinen balanyń qabiletin ushtaý tásilderin, sabaq túsindirý ádistemesin úırenedi. Onyń ústine, úzdik ustazdar onlaın oqytý arqyly shaǵyn jınaqty mektepterdiń 10-11-synyp oqýshylaryn UBT-ǵa daıarlaıdy. Bul kúnderi qanatqaqty jobaǵa qatysqan shaǵyn jınaqty mektepterde monıtorıng bastaldy. Astanadaǵy Nazarbaev zııatkerlik mektebinen jáne «Qazaqstan halqyna» qorynan kelgen 26 baqylaýshy 12 tirek mektep, 134 shaǵyn jınaqty jáne 7 baqylaý mektebiniń 6,8,10-synyp oqýshylarynan bes pán boıynsha test alýda. Osy arqyly bir jylda qaı mektepte bilim sapasynyń óskenin, qaı mektepte tómendep ketkenin anyqtaıdy. Bul joly baqylaýshylar qanatqaqty jobaǵa qosylmaǵan, biraq aptasyna bes pán boıynsha bir ret onlaın dáris júrgiziletin jeti mekteptegi oqýshylardyń bilim deńgeıin de baqylaýǵa aldy.
Osy jobaǵa qala mektepteriniń ustazdary yqylaspen kiriskenin atap ótken jón. О́ıtkeni olar aýyl mektebi oqýshylarynyń bilim sapasyn joǵarylatýǵa asa qulshynysty. Aýyl muǵaliminiń kásibı deńgeıin zamanaýı tásildermen jetildirýine jol ashqan jobanyń arqasynda, óz mamandyǵyn súıetin, izdenýden jalyqpaıtyn oqytýshylar qatary kóbeıip jatyr. Aýyldy túletý úshin eń aldymen mektebin túzetý kerek degen osy bolar.
Aqtóbe oblysy