О́skemen qalasynda 3 oqýshy aýrýhanaǵa tústi, úsheýin de bir kólik qaǵyp ketken, dep habarlaıdy Egemen.kz.
Shyǵys Qazaqstan oblysy polısııa departamenti baspasóz qyzmetiniń málimetine súıensek, jol-kólik oqıǵasy 14 qarasha kúni keshki ýaqytta bolǵan.
13-14 jas aralyǵyndaǵy balalar jattyǵýdan shyǵyp, úılerine qaıtyp bara jatqan.
«Sátbaev kóshesi men Jibek joly dańǵylynyń qıylysynda kele jatqan jeńil kólik júrgizýshisi joldan ótip bara jatqan 3 balany qaǵyp ketti. Sonyń saldarynan túrli dene jaraqatyn alǵan úsheýi de aýrýhanaǵa jatqyzyldy», dep habarlady polısııa departamenti.
Qazirgi ýaqytta atalǵan fakti boıynsha Qazaqstan Respýblıkasy Qylmystyq Kodeksiniń 345-baby 2-bóligine sáıkes sotqa deıingi tergeý amaldary júrip jatyr.
«Birqatar sot-medısınalyq saraptama taǵaıyndalǵan. Sonyń qorytyndysy boıynsha prosessýaldyq sheshim qabyldanady», delingen habarlamada.