Parlament Senaty Tóraǵasynyń orynbasary Jaqyp Asanov Fınlıandııanyń Ádilet kansleri Týomas Poıstımen kezdesti, dep habarlaıdy Egemen.kz Senattyń baspasóz qyzmetine silteme jasap.
Tóraǵa orynbasary óz sózinde Fınlıandııa Qazaqstannyń Eýropalyq Odaqtaǵy mańyzdy áriptesi bolyp tabylatynyn atap ótti jáne bizdiń elderimizdiń halyqaralyq negizgi máseleler boıynsha kózqarastary ortaq ekenin aıta kelip, BUU, EQYU jáne basqa da halyqaralyq uıymdar aıasynda tyǵyz yntymaqtastyq júrgizip kele jatqanyn atap ótti.
«Qazaqstan men Fınlıandııa arasyndaǵy parlamentaralyq baılanystardy damytý ekijaqty kún tártibindegi mańyzdy másele bolyp tabylady. Sonymen qatar bizge aldaǵy kezeńde Komıtetter delegasııalarynyń jumys baılanystaryn tereńdetý jáne parlamenttik qyzmet tájirıbesin, onyń ishinde zańnamalyq aktilerdi ázirleý jáne qabyldaý tájirıbesin zerdeleý úshin sapar almasýǵa bolady. Bul bizdiń ekijaqty ózara is-qımylymyzǵa jańa serpin ákeletinine senimdimin», dedi Jaqyp Asanov.
Taraptar kezdesý barysynda Qazaqstan Prezıdenti Qasym-Jomart Toqaevtyń bastamasymen júrgizilip jatqan saıası jáne ekonomıkalyq reformalarǵa qatysty máselelerdi talqylady. Tóraǵa orynbasary kanslerge elimizde júzege asyp jatqan «Ádiletti Qazaqstan» tujyrymdamasy týraly aıtty. Onyń maqsaty saıası júıeni transformasııalaý jáne barlyq salalarda ádilettilik qaǵıdatyn engizý, sondaı-aq júrgizilip jatqan saıası jáne ekonomıkalyq reformalardy zańnamalyq qamtamasyz etýdegi Parlamenttiń mańyzdy rólin belgileý bolyp tabylady.
Týomas Poıstı óz kezeginde eki el yntymaqtastyǵynyń mańyzyn joǵary baǵalady jáne olardyń tarapy Qazaqstanmen ózara qarym-qatynasty nyǵaıtý men damytýǵa daıyn ekenin atap ótti.