L.N.Gýmılev atyndaǵy Eýrazııa ulttyq ýnıversıtetinde «Qazaq lırıkasy jáne Marfýǵa Bektemirova poezııasy» atty halyqaralyq ǵylymı-tájirıbelik konferensııa ótti. Belgili aqyn hám aýdarmashy, pýblısıst marqum Marfýǵa Bektemirovanyń shyǵarmashylyǵyna arnalǵan rýhanı is-sharada qazaq jyrynyń órisi, tárbıelik máni men tanymdyq sıpaty týraly taqyryptar qozǵaldy.
Konferensııada ýnıversıtettiń áleýmettik-mádenı damý jónindegi prorektory Lázzat Nurqatova sóz sóıledi, zııaly qaýym ókilderi men ǵalymdar baıandama jasady. Ǵylym jáne joǵary bilim mınıstri Saıasat Nurbek pen «amanat» partııasynyń atqarýshy hatshysy Dáýlet Káribektiń aqyn shyǵarmashylyǵynyń máni men mańyzyn erekshelegen quttyqtaý hattary oqyldy. Fılologııa ǵylymdarynyń doktory, professor, aqyn Janat Aımuhambet baıandamasynda aqyn shyǵarmashylyǵyna jan-jaqty toqtaldy.
«Marfýǵanyń syrshyl da názik jandy aqyn sanasynda ornyqqan aıaýly uǵymdar onyń óleńderiniń tamyry bolyp búlkildep, armany men ańsaryn, ómirlik ustanymyn, ózindik bolmysyn aıqyndaıdy. Ásirese tazalyqty, meıirimdi, adaldyqty toǵystyrǵan móldirlik – Marfýǵanyń aqyndyq tabıǵatyn ańǵartatyn poetıkalyq beınege aınalǵan. Aqynnyń álemi eleýsiz ǵana aqqanymen, ózgelerdi ózine eriksiz tartatyn móp-móldir bulaq tárizdi», dep túıindedi ol baıandamasyn.
Jazýshy, pýblısıst Baqyt Rústemov, Til saıasaty komıtetiniń tóraǵasy Erbol Tileshov jyly lebiz bildirip, Jazýshylar odaǵy Astana fılıalynyń dırektory, aqyn Dáýletkereı Kápuly aqynnyń óleń ólkesindegi órnegine nazar aýdarsa, Qyrǵyz Respýblıkasynyń I.Arabaev atyndaǵy memlekettik ýnıversıtetiniń professory Aıda Egemberdıeva onlaın qatysyp, baıandama jasady.
Aqyn shyǵarmashylyǵyn kezinde Aqseleý Seıdimbek: «Jaı sezim emes, poezııaǵa aınalǵan sezim. Azapty aqylǵa jeńdirý, aqyldy Alla atymen ushtastyrý poezııa mártebesin odan saıyn bıiktetip tur. Mundaı poezııa janyńdy jadyratady, rýhyńdy asqaqtatady. Marfýǵa úshin aıaýly sezim men asqaq rýhtyń tuǵyry týǵan jer, atameken, qazaqtyń qadir-qasıeti», dep baǵalaǵany belgili.
Aqmola oblysynda dúnıege kelgen Marfýǵa Bektemirova sońyna az mura qaldyrmaǵan. «Janary jáýdir dúnıe», «Aıdynym meniń», «Ǵashyq júrek», «Eńlikgúl», «Meniń Atlantıdam», «Aqqýym, meniń qaıdasyń?», «Ozera dýshı», «Belyı parýs mechty» jyr jınaqtarynyń avtory. Shyǵarmalary birneshe ujymdyq jınaqtar men antologııalarǵa engen. Orys aqyny Anna Ahmatovanyń óleńderin aýdarǵan.
Is-shara aqynnyń jary, Qazaqstan Jýrnalıster odaǵy syılyǵynyń laýreaty Esengeldi Súıinovtiń sózimen qorytyndylandy.