О́z anasynyń qolynan qaza tapqan 7 jasar Mılana Davydovanyń qazasynan keıin Pavlodar oblysynda birqatar sheneýnik tártiptik jazaǵa tartyldy, dep habarlaıdy Egemen.kz.
Bul týraly oblys ákimi Asaın Baıhanov ótkizgen balalarǵa qatysty qylmystyń aldyn alý máselelerine arnalǵan arnaıy jıynda belgili boldy. Onyń aıtýynsha, qyzdyń óliminiń aldyn alýǵa bolatyn edi.
«Besqaýǵa aýylynyń turǵyny jeti jasar Mılana Davydovanyń basynan ótken jan túrshigerlik oqıǵa eshqaısymyzdy beıjaı qaldyrmady. Aýyr qaza júregimizdi aýyrtty. Múlde adamgershilikke jatpaıtyn áreket. Bul qaıǵyly oqıǵanyń aldyn alýǵa bolar edi. Balalar beıbit ýaqytta ólip jatyr, bul bizdiń kinámiz, úlkenderdiń kinási», dedi Baıhanov.
Ol sheneýnikterdi jazalaýǵa qatysty sheshim sheshim qabyldaǵanyn da sóz etti.
«Oblys ákiminiń orynbasary – oblystyń áleýmettik salasynyń jumysyn qadaǵalaıtyn Aızada Qurmanovaǵa, Ekibastuz qalasynyń ákimi Aıan Beısekınge, oblystyń bilim jáne halyqty áleýmettik qorǵaý basqarmalarynyń basshylary Samal Aıtqazına men Almıra Dıýsıýpovaǵa sógis berildi. Sonymen qatar oblys ákimi kenshiler qalasynyń basshysyna Ekibastuz qalasynyń laýazymdy tulǵalaryna, onyń ishinde Qoıandy aýyldyq okrýginiń ákimi Abaı Hakimovke tártiptik shara qoldanýdy tapsyrdy", dep jazdy Pavlodar oblysy ákiminiń baspasóz qyzmetinen.
Ekibastuz qalasynyń ákimine Davydovtar otbasyn baqylaýǵa alý júkteldi.
Eske sala keteıik, 3-synyp oqýshysy Mılana Davydova 17 qarasha kúni Pavlodar oblysy Besqaýǵa aýylynda joǵalyp ketken bolatyn. Anasynyń aıtýynsha, qyzyn tappaǵannan keıin ol polısııaǵa habarlasqan.
Izdestirý jumystary demalys kúnderi de oblys kóleminde jalǵasty. Jetkinshekti 500-den astam adam izdegen, sonyń ishinde volonterlar men oblystyń múddeli turǵyndary aýyl úılerin, jertólelerdi aralap, shatyrlarǵa shyǵyp, qudyqtardy tekserdi. Kınologtar, júzden astam avtokólik jáne «Qazavıaspa» tikushaǵy jumyldyryldy. Onyń jansyz denesi úıdiń janynan tabyldy. Ol 19 qarasha kúni keshke anasy moıyndaǵan kezde anyqtaldy. Mılanany óltirdi dep óz anasymen qatar qylmys izin jasyrýǵa kómektesken tanysy da kúdikke ilingen.
Mılana Davydova qaıtys bolǵannan keıin Bala quqyqtary jónindegi ýákil Dınara Zákıeva málimdeme jasady. Onyń aıtýynsha, bıyl Qazaqstanda 25 bala kóz jumdy, onyń 6-y jaqyn adamdarynyń qolynan qaza tapty.