Qyzylorda qalasynda «Anaǵa taǵzym» respýblıkalyq Analar forýmy aıasynda ótken Syr eliniń keleshek brendine aınalatyn jádigerler – «Shirik-Rabat saq jaýyngeri» jáne «Syǵanaq hanshaıymy» rekonstrýksııalarynyń tanystyrylymyna oblys ákimi Nurlybek Nálibaev qatysyp, músinderdi oblystyq mýzeıge tabystady, dep habarlaıdy Egemen.kz aımaq ákimdiginiń resmı saıtyna silteme jasap.
«Syrdarııanyń boıynda ómir súrgen saq mádenıetiniń jaýhary – altyn kıimdi «Shirik-Rabat saq jaýyngeri» men Altyn Orda kezeńindegi Uly dala kóshpendileriniń órkenıetin pash etetin altyn áshekeıli «Syǵanaq hanshaıymy» músinderi búgin mýzeıge tapsyryldy. Músinder arheolog-ǵalymdardyń ǵylymı negizdemelerine sáıkes jasaldy», degen oblys basshysy Nurlybek Mashbekuly jeltoqsannyń 8-9-y kúnderi elimizdiń bas shahary – Astanada ótetin Qyzylorda oblysynyń óner kúnderi aıasynda uıymdastyrylatyn «Syr óńiri – Túrki dúnıesiniń altyn besigi» kórmesinde atalǵan altyndatqan músinder elorda jurtshylyǵyna tanystyrylatynyn atap ótti.
Músinderdi rekonstrýksııalaýǵa oblystyq bıýdjetten 40 mln teńge bólingen. Týyndylardy arheolog-ǵalymdar Joldasbek Qurmanqulov, Ázilhan Tájekeevter, restavrator Qyrym Altynbekov, О́zbekstan jáne Tatarstan ǵalymdary Aısulý Japparbergenqyzy, Lıýdmıla Maklasovalar jasady.