«Atasý kentindegi E.Shahanov atyndaǵy tirek mektebiniń muǵalimi Nurgúl Shamaeva árqashan jańashyl izdenisterimen erekshelenip júredi. Oılap tappaıtyny joq. Qoǵamdyq jumystarǵa belsendi atsalysady. Bilikti de bilimdi ustaz. Shákirtterine ardaqty, ujymyna qurmetti». Atalǵan mekteptiń dırektory Saltanat Baıshókenova Nurgúl týraly osylaı dedi. Biz mektep basshysy maqtaýyn jetkizgen muǵalimmen tanysqansha asyqtyq.
Qazir shyny kerek, smartfon ustamaıtyn bala joq. Qansha jerden «ustama, ustaýǵa bolmaıdy» degenmen talap tek sóz kúıinde qalyp keledi.
– Másele – oqýshylardyń oqý kezinde telefonǵa alańdamaýy. Sondyqtan men olardyń telefondaryn sabaq bastalarda jınap alamyn da, qaıtatyn kezde ǵana beremin. Buryn qorapqa salyp qoıatyn edim, jaqynda óz qarajatyma arnaıy shkaf istettim. Ras, 50 myń teńge jumsadym. Azdy-kópti qarajat jumsaǵannan eshkim de kedeılenip qalmaıdy ǵoı. Synypqa, sabaqqa keregi bar ma, kez kelgen nárseni ózim jasata salamyn. Esesine ádemi kórinedi ári bala boıynda mádenıetti qalyptastyrady, – degen Nurgúldiń sózi tańdandyryp tastady. Mektep qajettiligi úshin qaı muǵalim qaltasyndaǵy qarjysyn jumsaıdy? Osylaı oılaımyz ǵoı. Qatelesedi ekenbiz, bar eken ondaı jandar.
«Oqýǵa qushtar mektep» dep atalatyn joba bar. Mekteptegi barlyq derlik is-shara osy baǵdarlama aıasynda júrgiziledi. «Mektep oqýǵa qushtar bolýy úshin ustazdar jańashyldyqqa umtylmasa, izdenimpazdyqqa yntaly bolmasa, eshteńe de ónbeıdi». Bul – Nurgúl Shamaevanyń pikiri.
Oǵan bıyl 6 «A» synybyna jetekshilik jasaý júkteldi. Ol synypqa bólingen kabınetti bezendirýge aıryqsha kóńil bóldi. Kabınettiń ishi kirse, shyqqysyz. Ártúrli gúlder kózdiń jaýyn alady. Otanshyldyq týǵan jerdi súıýden, sonyń qasıetin uǵynýdan bastalady. Tanymal tulǵalardyń portretteri, tarıhı oryndardyń sýretteri arnaıy tuǵyrlarǵa ornatylypty. Kózben kórgen kóńilge qonaqtaıdy. Kitap sóresiniń ózi qandaı? Osynyń bárine ol 200 myń teńgedeı qarjysyn jumsaǵan kórinedi. Munda qoıylǵan árbir nárseden izdenistiń izderi menmundalap tur.
Onyń eńbek ótili – 22 jyl. 2001 jyly О́.Baıqońyrov atyndaǵy Jezqazǵan ýnıversıtetin qazaq tili men ádebıeti mamandyǵy boıynsha támamdaǵan ol sodan beri ustazdyq jolda ter tógip keledi. Abyroıly. Ardaqty. Qurmetti. Qadirli. Budan artyq ne kerek? Bári de sol árdaıym jańashyldyqqa umtylatyn izdenimpazdyqtyń arqasy.
Ulytaý oblysy,
Jańaarqa aýdany