Parlament Senatynyń Tóraǵasy, Qazaqstan bochcha federasııasynyń Prezıdenti Máýlen Áshimbaev atalǵan paralımpıadalyq sport túrinen alǵash ret ótkizilip jatqan Qazaqstan Kýbogi jolyndaǵy jarystyń ashylý rásimine qatysty. Saıysqa elimizdiń 10 óńirinen kelgen 11-14 jas aralyǵyndaǵy 64 jasóspirim qatysyp jatyr. Olardyń qatarynda debıýtanttar da bar ekenin atap ótken jón, dep habarlaıdy Egemen.kz Senattyń baspasóz qyzmetine silteme jasap.
Jarysqa qatysýshylarǵa sáttilik tilegen Máýlen Áshimbaev qazirgi tańda bochcha elimiz boıynsha azamattarǵa qoljetimdi sport túrine aınalyp kele jatqanyn atap ótti. Sportshylardyń da kásibı deńgeıi artyp keledi. Buǵan Qazaqstan bochcha federasııasynyń resmı túrde Halyqaralyq bochcha federasııasynyń múshesi bolyp tirkelýi jáne el chempıonatynyń ótkizilýi aıqyn dálel. Sondaı-aq Qazaqstan quramasynyń Azııa paralımpıada oıyndaryna qatysyp, jalpykomandalyq esepte segizinshi oryn alǵanyn da atap ótken jón. Palata Spıkeri bul jetistikter sportshylardyń erik-jigeriniń jáne elimizde júrgizilip jatqan ınklıýzıvti saıasattyń nátıjesi ekenin aıtty. Osyǵan baılanysty Memleket basshysynyń tapsyrmasy boıynsha elimizde erekshe qajettilikteri bar azamattardy qoldaý jáne olarǵa qolaıly jaǵdaı jasaý baǵytynda aýqymdy jumys atqarylyp jatyr.
«Prezıdentimiz Qasym-Jomart Kemeluly Toqaev barlyq salada ınklıýzıvtilik qaǵıdatyn iske asyrýǵa basa mán berip keledi. Osy oraıda Memleket basshysynyń tapsyrmasyna sáıkes ınklıýzıvti sport túrlerin damytý úshin tıisti jaǵdaı jasalyp jatyr. Bul rette bochcha sııaqty sport túrlerine de úlken qoldaý kórsetilip otyr. Búginde Astanada jáne iri qalalarda ǵana emes, elimizdiń ózge de óńirlerinde bochchaǵa degen qyzyǵýshylyq artyp kele jatyr. Sondyqtan aldaǵy ýaqytta oblystarda jańa federasııalar ashylady dep senemiz. Osyndaı naqty qadamdar bochchashylarymyzdy Paralımpıada oıyndarynyń jeńis tuǵyryna jeteleıtini anyq», dedi Máýlen Áshimbaev.
Federasııa Prezıdentiniń aıtýynsha, qazirgi tańda Pavlodar, Qaraǵandy, Mańǵystaý, Atyraý, Qostanaı, Abaı jáne Jetisý oblystarynda bochchadan óńirlik federasııalar ashý jumystary júrgizilip jatyr.
Bochchadan Qazaqstan Kýbogi jolyndaǵy jarysty Týrızm jáne sport mınıstrliginiń qoldaýymen Qazaqstan bochcha federasııasy uıymdastyrdy. Sondaı-aq saıysqa Astana qalasy Dene shynyqtyrý jáne sport basqarmasy, «Samuryq-Qazyna» AQ jáne «Sport Qory» týrızm jáne sport ındýstrııasyn qoldaý qory qoldaý kórsetti.