D.Serikbaev atyndaǵy ShQTÝ bazasynda Qazaqstan men Qytaı arasyndaǵy yntymaqtastyq nátıjesinde «Lý Ban sheberhanasy» ashyldy, dep habarlaıdy Egemen.kz.
Sheberhananyń ashylý saltanatyna Shyǵys Qazaqstan oblysynyń ákimi Ermek Kósherbaev, Qytaıdyn elshisi Chjan Sıao jáne Qazaqstannyń ǵylym jáne joǵarǵy bilim mınıstri Sıasat Nurbek qatysty. Bul sheberhanany qurý týraly kelisimge Qazaqstan Prezıdenti Qasym-Jomart Toqaevtyń Qytaı Halyq Respýblıkasyna kóktemdegi sapary kezinde qol qoıylǵan bolatyn.
Lý Ban sheberhanasy qoldanbaly tehnologııa jáne joǵary tehnıkalyq bilim salasyndaǵy joba. Ol Shyǵys Qazaqstan tehnıkalyq ýnıversıteti men Tıanszın kásiptik ınstıtýty arasyndaǵy yntymaqtastyq aıasynda júzege asyryldy.
Búgin elimizde tuńǵysh ret Lý Ban sheberhanasy ashylyp jatyr. Muny eki el arasyndaǵy dostyqtyń nyshany dep aıtýǵa bolady. Bul tikeleı Memleket basshysynyń baqylaýynda iske asyrylǵan joba. Ǵylym jáne joǵary bilim mınıstrligi eń alǵash ashylǵanda el aýmaǵynda osyndaı zerthanalar qurý týraly tapsyrma bergen bolatyn. «Búginde sheteldiń eń myqty oqý oryndaryn elimizge shaqyryp, fılıaldaryn ashyp jatyrmyz. Aldaǵy 5 jylda elimizdiń taǵy 3-4 qalasynda osyndaı sheberhana ashý josparymyzda bar», dedi Saıasat Nurbek.
«Qazaqstanda sheberhananyń ashylýy stýdentterimizge Qytaıdyń zamanaýı jabdyqtaryn paıdalana otyryp, avtomobıl tehnologııalaryn meńgerýge múmkindik beredi jáne bolashaq ınjenerlerdi daıyndaýǵa yqpal etedi. Búgingi tańda álemniń 19 elinde 20 «Lý Ban sheberhanasy» jumys isteıdi», dedi Ermek Kósherbaev.
Chjan Sıao óz sózinde bul sheberhananyń mańyzy zor ekendigin, eki el arasyndaǵy kópir bolatyndyǵyn, Qytaı eliniń aldaǵy ýaqytta da Qazaqstanmen osyndaı jobalardy qolǵa alýǵa nıetti ekendigin jetkizdi.
Aıte keteıik, «Lý Ban sheberhanasy» bul elektromobılderge qyzmet kórsetetin ınjenerlerdi daıarlaıtyn ortalyq. Munda stýdentter elektr stansııalary men akkýmýlıatorlyq batareıalardy jóndeýge mashyqtanady.