Sınoptıkter aldaǵy úsh táýlikke arnalǵan aýa raıy boljamyn jarııalady. Boljamǵa sáıkes, aldaǵy úsh kúnde Qazaqstannyń basym bóliginde jaýyn-shashynsyz ashyq aýa raıy saqtalady, degenmen aıazdy kúnder qaıta bastalady, dep habarlaıdy Egemen.kz.
Qazaqstannyń shyǵysy arktıkalyq antısıklonnyń yqpalynda bolady. Sondyqtan munda aıazdy temperatýra ázirge tura beredi. 15-16 jeltoqsanda atmosferalyq fronttardyń áserinen respýblıkanyń batysynda, ońtústiginde jáne ońtústik-shyǵysynda qar jaýady.
Respýblıkanyń batysynda, ońtústiginde jáne ońtústik-shyǵysynda jel kúsheıip, boran soǵady, taýly aımaqtarda tuman túsedi, respýblıkanyń batysynda shańdy daýyl turady.
«Aýa temperatýrasy túnde birte-birte kóteriledi. Batysta — 5-15 gradýs aıaz, soltústik-batysta jáne ortalyqta — 10-25 gradýs aıaz, soltústikte — 17-28 gradýs, ońtústikte — 5-18 gradýs, ońtústik-shyǵysta — 10-25 gradýs aıazǵa deıin jylynady», deıdi mamandar.
Dese de, Qazaqstannyń shyǵysynda 30-40 gradýs aıaz saqtalady.