Dástúrge aınalǵan Jumabek Táshenov júldesi bıyl da óz úzdikterin anyqtady. Alǵashqyda jyldyń úzdik aqynyn ǵana ardaqtaýdy maqsat etken ıgilikti shara qanatyn keńge jaıdy. Bıyl on atalym boıynsha úzdikterin úkiledi.
Dostyq úıinde ótken is-shara shymyldyǵy Jumabek Táshenov týraly qysqasha beınefılmmen túrildi.
Qarap otyrsaq, osy bir jyl úzdikterin anyqtaıtyn aıtýly sharanyń Arqa jerinde uıymdastyrylyp kele jatqanyna on bes jylǵa jýyqtapty. Dástúrden jańylmaı, jyl ótken saıyn túrlenip ótýine aıtysker aqyn Aıtbaı Jumaǵulov eńbek sińirip júr. Al buǵan jolynan jyǵylmaı, jomarttyq tanytyp, demeýshilik kórsetip júrgen altyn júrekti azamat, «Jyl mesenaty» Sapar Ibkeevtiń de atyn atap ótkenimiz jón.
– El tonaýǵa, jer talaýǵa túskende týǵan eli úshin astyndaǵy taǵyn tárk etken tekti tulǵa, Alash arystarynyń amanatyn oryndaǵan Jumabek Táshenov bolatyn. Biz qaharman uldyń ónegeli isterin, qaıratkerlik jolyn, asyl murasyn dáripteý maqsatynda jyl saıyn ótkizip kelemiz. Jastardyń shyǵarmashylyǵyn shyńdap, olarǵa qamqorlyq kórsetip júrmiz. Jáne de elge adal eńbek etip júrgen qoǵam qaıratkerleri men belsendilerin marapattap otyramyz, – deıdi uıymdastyrýshy Aıtbaı Botpaıuly.
Keshtiń qadirli qonaǵy, J.Táshenovtan bata alǵan dáýlesker kúshi Muhamedjan Tileýhan sahnaǵa kóterilip, tulǵa jaıly esteligimen bólisip, kúı shertti.
Muhamedjan Qanaıulyna, E.Bóketov atyndaǵy Qaraǵandy memlekettik ýnıversıtetiniń fılologııa fakýltetiniń dekany, dosent Eldos Erǵazyulyna jáne ánshi Jana Qýanyshbekqyzyna oblystyq ishki saıasat basqarmasynyń basshysy Nurlan Bıkenov Alǵyshat tabystady.
Sonymen S.Seıfýllın atyndaǵy Qaraǵandy oblystyq akademııalyq qazaq drama teatrynyń dırektory Qurman Qalymov «Jyldyń úzdik qaıratkeri» atandy. Aımaqtyq, respýblıkalyq jyr dodalarynda top jaryp júrgen jas talant Bekarys Ospanov «Jyldyń úzdik aıtysker aqyny» atalymymen marapattaldy.
Qazaq poezııasynda aıshyqty qoltańbasy bar Serik Saǵyntaı «Jyldyń úzdik aqyny» atalymynda úkilendi. «Jyldyń úzdik qalamgeri» atalymynda Ernar Keıkın, «Ǵylym men bilimge jáne urpaq tárbıesine sińirgen eńbegi úshin» Rashıt Karenov qurmetke bólendi. «Oqý-aǵartý jáne urpaq tárbıesine sińirgen eńbegi úshin» tereń tarıhshy Tuńǵyshbaı Muqan marapattaldy.
«Jyldyń úzdik mádenıet jáne óner qaıratkeri» Sáýle Shıbaeva, «Jyldyń úzdik tilshisi» Janabek Nar, «Jyldyń atymtaı jomarty» Arman Abeýov, «Jyldyń úzdik belsendisi» atalymymen Ernat Melsuly atandy. Jyl úzdikterine arnaıy dıplom men qarjylaı syılyq tabystaldy.
Marapattaý rásiminen soń Qazaqstannyń eńbek sińirgen qaıratkeri, belgili ánshi Dosymjan Tańatarov ánnen shashý shashty.
Qaraǵandy oblysy