Bıyl Ishki ister mınıstrliginiń krımınaldyq polısııa qyzmetkerleri izdeýde júrgen 2500 qylmyskerdi ustady, dep habarlaıdy Egemen.kz mınıstrliktiń baspasóz qyzmetine silteme jasap.
Jedel ýákilder bir jyl ishinde ustaǵan qylmyskerlerdiń arasynda 34 kisi óltirýshi, 17 qaraqshy, 84 tonaýshy, 10 bopsalaýshy, 11 zorlyq kórsetýshi, 87 esirtki qylmyskeri bar.
«Osy jyldyń shilde aıynda Shymkentte ótken jedel-izdestirý is-sharalary barysynda bizdiń qyzmetkerler 2018 jyly Dýbaıda kisi óltirgeni úshin izdeýde júrgen er adamdy ustady. Sondaı-aq Tarazda 2022 jyldyń qarasha aıynan bastap Qaraǵandy oblysynyń polısııa departamentimen kisi óltirýge oqtalǵany úshin izdeýde júrgen eki azamat quryqtaldy», dedi IIM krımınaldyq polısııa departamenti bastyǵynyń orynbasary Rýslan Nazarov.
Polısııa qyzmetkerleri tek el ishinen izdeýmen shektelmeı, ózge memlekettermen de tize qosyp, qylmyskerdi ustaý operasııasyn júzege asyrady. Interpoldyń Ulttyq ortalyq bıýrosynyń kómegi kóp tıetini aıtyldy. TMD-ǵa múshe elderdiń aýmaǵynda bir jylda eki márte «Izdestirý» operasııasy júrgiziledi. Shet memleketterde júrgizgen operasııanyń nátıjesinde 70 qylmysker ustalyp, izdeýde júrgen 36 adam anyqtalǵan. Olar AQSh, Shvesııa, Germanııa, Túrkııa, sondaı-aq ózge de alys-jaqyn elderden tabylǵan. Qazaqstan aýmaǵynda basqa memleketterdiń quqyq qorǵaý organdary izdeý salǵan 374 qylmysker ustalǵan.