Qazaqstan Ulttyq Banki 2023 jylǵy 25 jeltoqsannan bastap jańa dızaındaǵy nomınaly 5 000 teńgelik banknotalardy aınalymǵa shyǵardy, dep habarlaıdy Egemen.kz.
Ulttyq bank baspasóz qyzmetiniń habarlaýynsha, jańa 5000 teńge dástúrli qazaq oıý-órneginiń bastaýshysy bolyp sanalatyn jáne kóshpendilerdiń biregeı mádenıetinen bastap búgingi Qazaqstanǵa deıingi el murasyn beıneleıtin «Saq stıli» elementterine negizdelgen.
Túsi — qyzyl-qyzǵylt sary. Banknottyń betki jaǵynda:
— kókte qalyqtap ushqan qus pen О́mir aǵashynyń butaǵy (Esik qorǵany, b. d. d. 5-4 ǵǵ., Altyn adam bas kıiminiń bir bóligi, tabıǵat pen nanym baılanysynyń qasıetti maǵynasy);
— DNQ spırali jáne adamnyń tabıǵatpen baılanysyn bildiretin oıý-órnek beınelengen sheksizdik sımvoly;
— jádiger-búrkit fıgýrasy túrindegi bezendirý (Qorǵan Taldy II, b. d. d. 7-6 ǵǵ.; búrkit sheksiz erkindiktiń, kúsh pen eptiliktiń sımvoly retinde).
Banknottyń syrt jaǵynda oıý-órnekpen bezendirilgen qalqan fonyndaǵy búrkit beınelengen. Negizgi beıneniń artynda dóńgelek qazaqtyń oıý-órnegi ornalasqan.
Nomınaly 5 000 teńge bolatyn jańa banknottar 2023 jylǵy 25 jeltoqsannan bastap aınalymǵa endi jáne jyl boıy aınalymdaǵy 2011 jylǵy úlgidegi nomınaly 5 000 teńge bolatyn ulttyq valıýta banknotasymen aýystyrylady.
Iаǵnı, eski úlgidegi barlyq banknottar bir jyl ishinde aınalymnan birtindep alynady. Tıisinshe, banknottar aınalymda qatar júrgen ýaqytta halyqqa eski úlgidegi banknottardy ekinshi deńgeıli bankterdegi nemese QUB fılıaldaryndaǵy jańa banknottarǵa aıyrbastaýdyń qajeti joq.
2023 jyldyń 25 jeltoqsanynan 2024 jyldyń 24 jeltoqsanyna deıin eski jáne jańa úlgidegi banknottar aınalymda qatar júrip, esep aıyrysýǵa jaramdy sanalady.
Ulttyq banktyń túsindirýinshe, jańa úlgidegi banknottar 2024 jyldyń naýryz aıynda ǵana jappaı aınalymǵa shyǵady. Sebebi olardy elimizdiń barlyq óńirine jetkizip, jabdyqtardy (bankomattar, termınaldar jáne kassalyq tehnıka t. b.) beıimdeý úshin ýaqyt qajet.