Keıde áýenmen-aq júrektiń kiltin tabýǵa bolady. Sózsiz, emosııasyz, tipti mımıkasyz-aq notaǵa túsken saz kóńil kógershinin erkin samǵatady. Ártúrli aspaptyń tolqynynan týǵan tamasha týyndylar – kórermenniń jan azyǵy. Osy aıaýly áserdi Taldyqorǵanda ótken klassıkalyq mýzyka keshinen aldyq. Adamnyń jan álemine erkin boılaǵan kórkem shyǵarmalar shynaıy ónerdiń qudiretin sezindirdi.
«Qazaqtyń án áýezderiniń tamasha bir qasıeti — onyń shyn júrekten shyqqan emosııalyq sezimtaldyǵy men sezgishtigi». О́nertanýshy Borıs Astafevtiń osy bir oımaqtaı oıyna ılanbasqa bolmas. Taǵdyr arqalap júrgen árbir adamnyń ónerden alar ózindik sezimi bolady desek, jalpy adamzattyq ińkárliktiń názik pernesin bebeýletip jiberetin qudiretti ónerdiń bir parasyna mýzykany jatqyzamyz. Al osynaý saz álemindegi bıiktikti órkenıet órinen tabylǵan elder klassıkalyq mýzyka dep biletini daýsyz.
Kúldir-kúldir kisiner tulparmen janyn úndes dep biletin, ózin jylqytekti halyqpyn dep sanaıtyn qazaqtyń klassıkalyq mýzyka ónerden alǵan úlesi joq emes. Keshegi ǵasyrdyń alyby sanalǵan M.Tólebaev bastaǵan kompozıtorlar klassıkalyq mýzyka tuǵyryna tý ildi. Osylaı dep oı tujyryp otyrǵanmen Taldyqorǵan tórinde jańasha lep eskenin baıqaǵandaı kúıge bólendik. О́ıtkeni osy jyldyń mamyr aıynda Jetisý oblysynyń ákimi Beıbit Isabaevtyń tikeleı qoldaýymen alǵash ret oblystyq fılarmonııa janynan estradalyq-sımfonııalyq orkestr qurylǵan-dy. Osy bir qysqa merzim ishinde ózindik súrleý-soqpaq tapqan óner ujymy jetisýlyqtarǵa mýzykalyq kesh usyndy.
Qos bólimnen týrǵan rýhanı shara tyńdarmandardy tánti etkeni anyq. Elimizge tanymal «Qazaqstan Kameratasy» klassıkalyq mýzyka ansambli, Halyq ártisi Gaýhar Myrzabekova, Qazaqstannyń eńbek sińirgen qaıratkeri, professor Bekbolat Baısaǵatov qonaq bolǵan kesh kóńildi kókjıekpen astastyrǵandaı áser qaldyrdy.
Shynymen de, Dánesh Raqyshev atyndaǵy oblystyq fılarmonııanyń estradalyq-sımfonııalyq orkestri qurylǵaly saz qorjynyn tolyqtyryp, ónerpazdarynyń kásibı sheberlikterin shyńdaýda úlken jumystar atqarǵany kesh barysynda kózge shalyndy. Arnaıy kelgen qonaqtarmen birlese óner kórsetken orkestr eńbegin tamashalaýǵa jetisýlyq zııaly qaýym ókilderi molynan jınalǵanyn da aıta ketken jón. Aımaq basshysynyń ózi kórermen qatarynan tabylǵan rýhanı keshte «Vremena goda», «Konsert dlıa fleıty», «Melodııa dlıa fleıty», «Sımfonııa 29 fınal» «Happy new year», «Aıttym sálem Qalamqas», «Piece in jazz-rock», «Chi-mai», «Le lecon partticuliere», «You raise me up», «Vibaldiana», «Lay al your love on me», «Kúnder-aı», «Otan tańy», «Shýtka», «Vals» syndy tanymal mýzyka týyndylary oryndaldy.
Qazaq saz áleminde esimi erekshe yqylaspen aıtylatyn elimizdegi tulǵalar men óńirimizdiń maqtanyshtary birlesken konsert ónersúıer kópshilikti rýhanı qazynamen keneltken de bolar dep paıymdaımyz. San aspaptan shyqqan ásem únge eltigen bizdiń kóńil osy paıymǵa ulasyp sala bergeni de anyq. Dese de kompozıtor Serik Erkimbektiń konsertke arnaıy jazylyp, alǵash ret I.Jansúgirov atyndaǵy Mádenıet saraıy sahnasynda oryndalǵan Táttimbettiń «Sarjaılaý» kúıiniń taqyrybyndaǵy jazz and rock avtorlyq shyǵarmasynan tartyp, avtordyń ózi, joǵaryda atalǵan óner juldyzdary, jetisýlyqtardyń maqtanyshy «Qurmet», «Parasat» ordenderiniń ıegeri Álı Alpysbaev, halyqaralyq baıqaýlardyń laýreaty Medet Esbergenovtermen jalǵasqan óner sherýi kóńil shalqytty.
Qazaqtyń aqsuńqar aqyny Sultanmahmut Toraıǵyrov «…bizdiń qazaq ánqumar halyq… Bireý qolyna dombyra ustap án sala bastasa, oıdaǵy-qyrdaǵysy jınalyp, segizdegi bala, seksendegi shalyna deıin qalmaı qamalap, aıtshy-aıtshylap janyn jaǵasyna keltiredi. Bara-bara ne bolsa da sol ándegi rýh súıegine sińedi, qulaǵynda qalady», degen pikiri áli de óz qasıetin joǵaltpaǵandaı. Biz soǵan taǵy bir márte kóz jetkizdik.
Jetisý oblysy