Keıingi jyldary elimizge alys-jaqyn shetelderden túrli ánshiler jıi kele bastady. Bir jaǵynan qýantarlyq jańalyq. Endi she, burynǵydaı emes shartaraptyń túkpir-túkpirindegi óner ıeleri Qazaq elin tanı bastady degen sóz.
Mysaly, keıingi jyldary toǵyzynshy terrıtorııaǵa kelip án shyrqaǵan sheteldikterdiń esiminen at úrkedi. Alysqa barmaı-aq qoıalyq. Kúni keshe elimizde 2000-jyldary shartarapqa tanylǵan Akon, 50 Cent sekildi reperler konsert qoıdy. Olardy kórýge jınalǵan halyqta esep joq. Bılet quny da arzan emes. Endeshe, tanymal juldyzdardyń elimizge jıi kelýi jalpy halyqtyń ál-aýqatynyń jaqsara bastaǵanyn da bildiredi. Áıtpese, qomaqty qarajatty ekiniń biri sanap bere almasy túsinikti ǵoı.
Shetelderden ánshiler shaqyrýdy qoldamaıtyndar da bar. Birinshiden, olardyń «gonorary» az emes. Ásirese muhıttyń arǵy betinen at terletip keletinder dollardy shytyrlatyp sanap alatyny belgili. Jeke adamdar otbasylyq toılaryna shaqyryp jatsa meıli eken. Alaıda elimizdegi konsertti uıymdastyrýshylardyń talǵamsyz shaqyrýy qanshalyqty oryndy degen zańdy saýal týyndaıdy.
Ekinshiden, Akon ne 50 Cent sekildi ánshiler kezinde ataǵy shyǵyp, dúrildep turǵanymen, búginde sahnaǵa jıi shyǵyp, tyńdarmandaryn qýantyp júrgen joq. Bylaısha qarabaıyr tilmen aıtqanda, «zeınetke shyqqan» óner juldyzdary. Endeshe, kezinde tanylǵan, biraq qazir kópshilik nazarynan tasa ánshilerdi shaqyrýdyń qajeti qansha?
Úshinshiden, joǵaryda aty atalǵan óner juldyzdaryn kúmis kómeı ánshi, óner áleminiń naǵyz maıtalmany dep aıtý qıyn. Ras, olardy stýdenttik shaǵymyzda radıodan da, magnıtofonnan da jıi tyńdadyq. Bálkim, olardy óz kózimizben kórý bizdiń qurdastarymyzdyń jastyq shaǵyn saǵyna eske alýyna múmkindik beretin shyǵar...
Olar Dımash Qudaıbergen, Sia sekildi erekshe daýsymen, Shakıra sekildi myń buralǵan bıimen tanylǵan emes. Andrea Bochchelı sekildi klassıkalyq hám operalyq mýzykanyń maıtalmany emes. Bar-joǵy kezinde hıtke aınalǵan rep janrynda aty shyqqan óner juldyzdary. Tipti Eminem ne Doctor Dre sekildi rep janrynyń betke ustary da sanalmaıdy.
Tórtinshiden, Akon da, 50 Cent te óleńderinde beıádep sózimen este qalǵan. Mysaly, senegaldyq ánshiniń «Smack that» ániniń maǵynasy tym turpaıy. «Elý tıyn» da bul turǵyda eshkimnen qalyspaıdy. Onyń «Candy shop», «P.I.M.P», «In da club» ánderi de tunyp turǵan erotıkalyq sıpatta. Endeshe, qylmysty, ádepsizdikti nasıhattaıtyn óner juldyzdaryn elimizge shaqyrýdyń qanshalyqty qajeti bar?
Aıtpaqshy, bul másele qoǵam nazarynan tys qalǵan joq. Májilis depýtaty, belgili aıtysker aqyn Amanjol Áltaı osyǵan baılanysty depýtattyq saýal joldady. Onda elimizge gastrolmen keletin sheteldik ánshiler men shoýmenderge, «ańqaý elge aramza molda» bolyp júrgen arzanqol aqyl saýdalaǵysh túrli koýchterge eshqandaı talǵaýsyz esigimizdi aıqara ashyp qoıǵanymyzǵa qynjylys bildirdi.
«Kúni keshe ǵana Astanada ótken Eıkonnyń konsertine baılanysty birneshe aspektilerge toqtalaıyn. Birinshiden, konsert kezinde jankúıer jastar ánshige ish kıimin laqtyryp, tómen moraldyq minez-qulyq kórsetti, elimizdiń bedeline nuqsan keltirdi. Bul – jastar tárbıesiniń álsizdigi. Ekinshiden, ulttyq ózegi álsiz, ózgeni pir tutqysh jastar ánderdiń konteksinde baıqalatyn genderlik kemsitýshilik máselesin, qyzdardyń namysyn, abyroıyn qorlaıtyn teris mazmunyn ańǵarmaı esi ketti. Úshinshiden, «Smack that» ániniń mátininen erotıkalyq sıpattaǵy nápsini qozdyrýǵa ıtermeleıtin, sanany laılap, tárbıege teris áser etetin qaýipti mazmundy ańǵaramyz. Tórtinshiden, uıymdastyrýshylardyń ánshini ulttyq kıimmen qarsy alyp, dombyra syılaǵandary tipten orynsyz dep sanaımyn», deıdi A.Áltaı.
Depýtat syny oryndy. Akon sekildi rep ánshilerdiń jezókshelik pen áıelderdi qorlaýdy nasıhattaıtynyn óleń sózderinen ańǵarý ońaı. Tipti 50 Cent kezinde turmystyq zorlyq-zombylyq jasady degen kúdikpen tutqynǵa alynǵan. Al Akon kóp áıel alýdy jaqtap suhbat bergeni de esimizde.
Osyndaıda olarǵa ulttyq kıim kıgizip, dombyra syılaý qanshalyqty oryndy? Qazaq qonaqjaı halyq ekeni túsinikti. Biraq qonaqjaılyqtyń da shegi bolýy qajet emes pe? Onyń ústine turmystyq zorlyq-zombylyq órship turǵan sátte sony nasıhattaıtyn óner juldyzdaryn basqa shyǵarýdyń ne qajeti bar? Bálkim, depýtat Amanjol Áltaı aıtqandaı, shetel ártisterin tańdaýda qatań talap engizý qajet shyǵar.