Qazaqstan fDi Intelligence sarapshylarynyń Azııa, Afrıka, Taıaý Shyǵys, Eýropa elderi ınvestısııalyq tartymdylyǵyna qatysty júrgizgen zertteýiniń qorytyndysy boıynsha reıtıngte altynshy oryn aldy.
Onda Halyqaralyq valıýta qory fDi Markets tikeleı sheteldik ınvestısııalar (TShI) monıtorıngi derekteri negizinde 50 iri álemdik baǵyttaǵy sheteldik ınvestısııalardyń traektorııasy men makroekonomıkalyq kórsetkishteri eskerilip, baǵalandy. Búgingi álem pandemııadan keıingi qalpyna kelý úderisin bastan ótkerip jatyr.
Sarapshylardyń pikirinshe, 2023 jyly Azııa elderi oń nátıje kórsetti. Alǵashqy ondyqtaǵy alty pozısııada Azııa elderi tur. Reıtıngte birinshi oryndy Kambodja alady. Odan keıin Fılıppın, tórtinshi orynda – Irak, altynshy orynda – Qazaqstan, jetinshi orynda – Ázerbaıjan, onynshy orynda Úndistan ornalasqan. Top-10 qataryna úsh afrıkalyq memleket engen. Olar Kenııa (úshinshi oryn), Namıbııa (besinshi oryn), Marokko (segizinshi oryn).
HVQ boljamy boıynsha bıyl ishki jalpy ónim ósimi 6,1 paıyzdy quraıdy (2023 jylǵy 5,6 paıyzben salystyrǵanda) jáne keler jyly Kambodja Ońtústik-Shyǵys Azııadaǵy ekonomıkasy eń jedel damyǵan elge aınalady. Al ınflıasııa týra 2023 jylǵydaı 2024 jyly da 3 paıyz deńgeıinde saqtalady. Qurylymdyq jáne sıkldik faktorlar elderdiń ekonomıkalyq kórsetkishterine áser etken.
FDI Standouts Watchlist-tiń jyl saıynǵy zertteý dereginshe, sheteldik ınvestısııa salasyndaǵy aýtsaıder Kambodja eń kúshti ınvestısııalyq deńgeıin saqtaıdy. Bul memleket Qytaımen, Ońtústik Koreıamen erkin saýda baılanysy kelisimin jasasqannan keıin saýda qatynastaryn nyǵaıtty. Eki elmen kelisim de 2022 jyly kúshine engen bolatyn.
Qazaqstan burynǵy keńestik keńistik elder arasynda tikeleı sheteldik ınvestısııa tartýdan kóshbasshylyq pozısııada tur. Ortalyq Azııa elderi arasyndaǵy úlesi – 61 paıyz. Syrtqy ister mınıstrligi Investısııa komıtetiniń aqparaty boıynsha 2023 jyldyń qańtarynan beri jalpy ınvestısııalyq quny 602 mlrd teńge bolatyn 59 ınvestısııalyq kelisimshart jasalǵan.