Reseıdiń kenge baı aımaǵy sanalatyn Kemer oblysynyń gýbernatory laýazymyn 21 jyl atqaryp, óz yqtııarymen qyzmetinen bas tartqan qaıratker Aman Tóleevtiń senimdi ókili qazaq halqyna alǵysyn aıtty.
Aman Tóleev Reseı prıezıdenttigine 3 márte kandıdatýrasyn usyndy. Kómirli aımaq Kemer oblysyn 1997 jyldan bastap basqarǵan qaıratker 2018 jyly oblys ortalyǵyndaǵy saýda-sattyq kesheninde birneshe adamnyń ómirin jalmaǵan órtten keıin merziminen buryn qyzmetinen ketýge aryzyn jazdy. Byltyr qarasha aıynda 79 jasynda aýyr naýqastan qaıtys boldy.
Áleýmettik jelide taraǵan beıne úndeýinde Aman Tóleevtiń uzaq jyl senimdi ókili bolǵan Zınaıda Abdýlova «Halyqtyq gýbernator» ataǵyn alǵan qaıratkerdi aqtyq saparǵa attandyrý rásimi qalaı bolǵanyn baıandady.
«Qurmeti Qazaqstan halqy, qadirli otandastar! Allanyń razylyǵy úshin musylman baýyrlarymyz kelip Aman Tóleevtiń jerleý rásimin ótkizip, arýlap kómdi. Musylmandyq joralǵymen janaza namazy oqylyp jerlegen soń Amannyń ózi salǵan Kýzbastaǵy meshitte quran baǵyshtaldy. Kýzbastaǵy musylman qaýymnyń yqylasymen Amannyń anasynyń atyna berilgen bolatyn bul qulshylyq úıi.
Aman basshylyq qyzmet atqarǵanda Kýzbasta 20 meshit salyndy. 21-inshi meshit salynyp jatyr. Aman onyń qurylysyn aıaqtaýǵa úlgermedi. Biz bul meshittiń de el ıgiligine beriletinine senemiz.
Tamyrynda qazaq deıtin qany oınap turǵan azamat bir sátke de qaraqan basynyń qamy úshin ómir súrgen joq, elge bolsa, halyqqa paıdam tıse dep ótti ómirden. Men 40 jylǵa jýyq qanattasyp qasynda boldym, mundaǵy halyqtyń Aman Tóleevke degen qurmeti erekshe, «bizde dál mundaı gýbernator bolǵan da, basqarǵan da joq» dep baǵalaýy mereıimizdi ósiredi. Aman Tatarstan astanasy Qazandaǵy Qul Shárip meshitiniń salynýyna, Almaty qalasyndaǵy Beket ata meshitiniń boı kóterýine de sebepker boldy. Qanshama kómek suraýshylarǵa qoldaý kórsetti. Kimnen qandaı shaǵym tússe de jaýapsyz qaldyrǵan joq, barlyǵyna bolysty.
Qazaqstannan kelip musylmandyq saltpen jóneltýge qoldaý kórsetken azamattarǵa otbasy atynan zor alǵysymyzdy aıtamyz. Aman Tóleev qalaı jerlendi degen de áńgime qoǵamda abyń-kúbiń ańys týdyrdy. Qazaqstannan musylman baýyrlarymyz arnaıy kelip, janaza namazyna qatysyp, meshitte quran baǵyshtap, musylmandyq saltpen jerlengenine kýá boldy», dedi Kemer oblysynda meshit qurylysyn úılestirý jóninde senimdi ókil qyzmetin atqarǵan Zınaıda Abdýlova. Ol osyndaı birtýar azamatty ómirge ákelgen qazaq eline alǵysyn jetkizip, Aman Tóleevti joqtap kelýshilerge qashanda qarashańyraqtyń esigi ashyq ekenin aıtty.