Erkin kúresten ulttyq qurama kóshbasshysy Azamat Dáýletbekov Horvatııa astanasy Zagreb qalasynda ótip jatqan Zagreb Open reıtıngilik týrnırinde kúmis júldeger atandy.
86 kg salmaq dárejesinde beldesken balýanymyz aldymen úndistandyq Dıpak Pýnııany 6:2 esebimen qapy qaldyrdy. Bul qarsylasy – 2019 jylǵy əlem chempıonatynyń kúmis júldegeri atanǵan tájirıbeli balýan. Odan keıin Azamat ýkraındyq Valentın Babıı men grýzııalyq Evsem Shvelıdzeni tize búktirip, fınalǵa joldama aldy. Al fınalda baby keliskenimen, baǵy janbaı, Bolgarııa atynan synǵa túsip júrgen reseılik Magomed Ramazanovqa 5:8 esebimen ese jiberdi. Sóıtip, kúmis júldeni moınyna ildi. Osy oraıda Azamattyń byltyr Serbııa astanasy Belgradta ótken əlem chempıonatynda qola júldege ıe bolyp, Parıj Olımpıadasynyń joldamasyna qol jetkizgenin aıta ketken jón.
Sonymen qatar reıtıngilik bəsekede qyzdarymyz da el namysyn qorǵaıdy. Atap aısaq, Irına Kazıýlına (65 kg), Elena Shalygına (68 kg) men Elmıra Syzdyqova (76 kg) kúsh synasady.