Qazaqtyń birtýar tulǵasy, kósemi Dinmuhamed Ahmetuly Qonaevtyń týǵanyna búgin 112 jyl tolyp otyr, dep jazady Egemen.kz.
Dinmuhamed Ahmetuly (1912-1993) - asa kórnekti memleket jáne qoǵam qaıratkeri, úsh márte Sosıalıstik Eńbek Eri, Qazaq KSR Ǵylym akademııasynyń akademıgi, tehnıka ǵylymynyń doktory, KSRO, shet el ordenderi men medalderiniń ıegeri. Ol otyz jyldan astam ýaqyt el basqardy.
D. A. Qonaev 1912 jyly 12 qańtarda Almaty qalasynda dúnıege kelgen. Eńbek jolyn 1936 jyly Máskeýdegi altyn jáne tústi metaldar ınstıtýtyn bitirgennen keıin Qońyrat kenishinde bastady. Ol dıplomyn Qońyrat kareriniń qýattylyǵyn 90 myń tonna qara mys berýge jetkizý jóninde jazyp, ony úzdik baǵamen qorǵap shyǵady. О́zi jumys istegen úsh jylda burǵylaý stanoginiń jumyskerliginen bastap seh bastyǵy, rýdnıktiń tehnıka bóliminiń meńgerýshisi, bas ınjeneri, dırektory bolyp qyzmet atqardy.
Sol jyldary Qońyrat qurylysy qaryshtap damyǵan edi. D.Qonaevtyń ózi turǵan úı, balabaqsha, aýrýhana, mádenıet úıi salyndy. Osyndaı qajyrly eńbegi úshin 1938 jyldyń shilde aıynda «Erekshe eńbegi úshin» medalimen marapattaldy.
Uly Otan soǵysy jyldarynda ol óndiris jumysyn joǵary dárejede uıymdastyrýshylardyń qatarynda ǵana qalǵan joq, 1942-52 jyldary Qazaq KSR Halyq Komıssarlar Keńesiniń orynbasary boldy. Odan keıin 3 jyl Ǵylym Akademııasynyń Prezıdenti bolyp qyzmet atqardy. Respýblıka Halyq Komıssarlar Keńesiniń tóraǵasy bolyp eki kezeń-1955-60 jyldary jáne 1962-64 jyldary jumys istedi. Odan keıin D.Qonaev respýblıkalyq partııa uıymyn 1986 jyly zeınetkerlik demalysqa shyqqanǵa deıin shırek ǵasyrǵa jýyq ýaqyt basqardy.
Dinmuhamed Ahmetuly Qonaev týǵan jeri Almatyda turǵan. 1993 jyly 22 tamyzda qaıtys bolyp, Keńsaı zıratyna jerlendi.
Aıta keteıik, elimizde eki jyl buryn Qonaev qalasy boı kóterdi. 2022 jylǵy 3 mamyrda Memleket basshysy Qasym-Jomart Toqaevtyń Jarlyǵymen Qapshaǵaı qalasy resmı túrde Qonaev bolyp ózgertildi.
Uly saıasatker Dinmuhamed Qonaevty eske alý maqsatynda onyń nemereleri kunayev.kz resmı saıtyn ashty. Onda onyń ómirbaıanyn, qundy qujattaryn, baıandamalary men muraǵattyq fotosýretterin oqyp, kórýge bolady. 1992 jyldan beri Almatyda Qonaev atyndaǵy halyqaralyq qor jumys isteıdi. Al 2002 jyly Qonaev murajaı-úıi ashylyp, 2003 jyly Dinmuhamed Ahmetuly ómiriniń sońǵy jyldaryn ótkizgen Almaty oblysy, Alakól aýdany, Aqshı aýylynda memorıaldyq taqta ornatyldy.