Dıagnozy qoıylmaǵan dert

2021 jyldyń qyrkúıek aıynan bastap barlyq óńirde birlestik fılıaldary ashylyp, jumys isteı bastady. Memlekettik satyp alýlar ne­gizinde memleket qarjysyn jymqyrýdy anyqtap, aldyn alyp, jolyn kesý baǵytynda táp-táýir tájirıbe jınaqtap qalǵan birlestikke el úmit­pen qarap otyr. Qoǵamǵa den­dep enip, dıagnozy qoıyl­maǵan dertke aınalǵan jem­qor­lyqtyń jolyn kesip, jemqordyń jelkesin úzedi degen úlbiregen úmit bar. Jalpaq jurtqa jarııa bolǵan jumys nátıjesine qarap, el senimi de nyǵaıyp keledi. Oblystyq fılıal ótken jyl­dyń 11 aıynda sybaılas jem­qorlyqqa qarsy is-qımyl de­partamentine alty materıal jibergen. Olarǵa baılanys­ty sotqa deıingi tergep-tekserý jumystary júrgizilip keledi. 29 ákimshilik hattama toltyrylypty. Memlekettik satyp alý portalyna oblys boıynsha júrgizilgen monıtorıng qorytyndysy negizinde fılıaldyń aralasýymen 1 mıllıard teńgeden astam bıýdjet qarjysy únemdel­gen. Tipti jazataıym jańy­lysqannan emes, áldebir aram nıettiń qulaǵy qyl­tıyp tur dep aıtýǵa da bola­tyndaı. Máselen, Kókshe­taý qalasynyń ákimdigi qala­ny abattandyrý úshin 500 oryndyq pen qoqys jáshi­gin satyp alýǵa jalpy kóle­mi 112,5 mıllıon teńge bó­lip­ti. Áýeli fılıal 500 oryn­dyqtyń qajeti bar ma, olar qaıda ornatylmaq, daıyn sulbasy ázirlengen be degen saýaldar tóńireginde zertteý júrgizgen. Ekinshiden, jumsalatyn qarjy tipti orta deńgeıden de joǵary. Má­se­len, Stepnogor qalasy­nyń ákimdigi satyp alǵan osyn­daı bir oryndyq pen qo­qys jáshigine 112 myń teńge jumsasa, Kókshetaý qala­syn­da kólemi de, sıpaty da dál osyndaı oryndyq pen qoqys jáshigin satyp alýǵa 225 myń teńge jum­sal­maq. «Ádildik joly» res­pýb­lı­ka­lyq qoǵamdyq birles­tigi­niń oblystyq fılıa­ly­nyń sarapshysy Samıra Táıte­novanyń aıtýyna qara­ǵan­da, tıisti oryndarǵa hat joldanǵanymen, shara qolda­nylmaǵan. Osy arada qandaı qorytyndy shyǵarýǵa bolady? Memlekettiń qyrýar qar­jy­syn tıimsiz jumsaý óz aldyna, adaldyqtyń kirpik qaq­pas kúzetshisi bolýǵa tıisti mem­lekettik organ qoǵamnyń piki­rin eskerip, ózderiniń óres­kel qatelikterin túzetýge tip­ti de daıyn emes bolyp shyq­­ty. О́kinishtisi de osy. Osy­­laısha, dert dendep-aq tur.

Oń sheshimin tapqan mysaldar da bar. Máselen, jedel járdem qyzmeti 42 mıllıon teńge qarajatqa 80 beınetirkegishti satyp alýdy toqtatty. Eger bul jumys júzege asyrylǵanda, árbir beınetirkegish bıýdjetke 500 myń teńge shyǵyn ákeler edi.

Osy arada taǵy bir mysal keltir­sek, artyq bolmas. «Býrabaı» ulttyq tabıǵı parki ań-qusqa berile­tin dándi daqyldardy qalypty baǵa­dan eki ese qymbatqa satyp almaq bo­lyp árekettengen. Sál ǵana taratyp aıtatyn bolsaq, memlekettik me­keme 206 tonna sulyny 32,2 mıllıon teńgege satyp almaq. Iаǵnı ár tonnasy 156 250 teńgeden aınalyp otyr. Bıyl óńirdegi astyq ylǵal­dy bolýyna baılanysty sapasy bolǵandyqtan, quny da arzan. Sulynyń ár tonnasy 55 pen 75 myń teńge aralyǵynda. Aıyrmasyn esepteı berińiz. Ań-qustyń tilin biletin park basshylary arpanyń baǵasyn bilmeı qaldy degenge kim sener. Degenmen ulttyq tabıǵı parktiń baspasóz qyzmetiniń málimdeýine qaraǵanda, suly ótken jyly osyndaı baǵaǵa satylǵan eken. Bıyl da sol baǵamen almaq. Fılıaldyń atynan «Býrabaı» ulttyq tabıǵı parkine hattama jol­dan­ǵan. Konkýrstyń habarlamasy óz kúshin joıdy.

Bul – birer ǵana mysal. Bıýdjet qarajatyna, el ıgili­gine ıe kerek deıtinimiz de sondyqtan. 

Aqmola oblysy