Kózi qaraqty jurt ańǵarsa kerek, qazirgi ýaqytta memleketimizdiń barlyq salasynda eleýli ózgerister bolyp jatyr. Qaraly qańtar oqıǵasynan keıin Konstıtýsııamyzǵa zaman talabyna saı ózgerister engizilip, bılik pen halyqtyń arasynda ashyq dıalog ornady. «Estıtin Úkimet» jasaqtalyp, áleýmettik salada qordalanyp qalǵan túıindi máseleler júıeli sheshimin taba bastady. Ulttyq qordan balalarǵa qarjy berý máselesin retteıtin zań kúshine endi.
Memleket basshysy Qasym-Jomart Toqaev «Egemen Qazaqstan» gazetindegi suhbatynda saıasatqa, rýhanı ósýimizge, mádenıetke, ekonomıkaǵa, jalpy elimizdi jańa baǵytta damytýǵa qatysty oılaryn ortaǵa salyp, mańyzdy máselelerdi kóterdi. Kólemdi suhbatty oqyp, kókeıdegi san saýalǵa jaýap aldyq.
«Tarıhty bilmeı ótkendi, qazirgi jaǵdaıdy bilý, bolashaqty boljaý qıyn», degen eken ǵulama-ǵalym ál-Farabı babamyz. Suhbattan eldik pen birlikti nyǵaıtý baǵytyndaǵy suraqtarǵa tushymdy jaýap aldyq. Máselen, Joshy ulysynyń 800 jyldyǵyn dáıektep, myńjyldyqtarmen sabaqtasqan tarıhymyzdy tereńdetýdi nusqady. Eýrazııa qurlyǵynda ımperııa deńgeıindegi qaǵanatty tól tarıhymyzdyń bir bólshegi retinde dáriptep, tarıhı sanany dáıektep memleketshildikti arttyrý mańyzdy dep bilemiz. Osy oraıda bizdi, ustazdar qaýymyn taǵy bir erekshe jaıt qýantty. Iаǵnı tarıhı iri tulǵalar taǵylymymen tabystyratyn is-sharalarǵa memlekettik deńgeıde kóńil bólinip otyr. Belgili ǵalym Qanysh Sátbaevtyń – 125, qazaqtyń batyr uldary Saǵadat Nurmaǵambetov pen Rahymjan Qoshqarbaevtyń 100 jyldyǵy atalyp ótpek.
Suhbatta atap ótilgendeı, bıyl elimizde Dúnıejúzilik kóshpeliler oıyny ótedi. Bul – Túrki álemin jaqyndastyratyn, tamyrlas elderdiń rýhanı yntymaqtastyǵyn jandandyratyn ıgilikti bastama der edim. Uly daladaǵy kóshpeliler órkenıetiniń murageri sanalatyn baýyrlas halyqtardyń mádenı-gýmanıtarlyq baılanysyn odan ári arttyrý – barshamyzǵa abyroıly mindet.
Prezıdenttiń jalpyulttyq qundylyqtar, sapaly ult qalyptastyrý joldary týraly aıtqan oılary da ishimizdi jylytty. Memleket basshysy Naýryz – jańarý men jańǵyrýdyń sımvoly ekenin, sondyqtan tól merekemizdiń mazmunyn baıytyp, ony barynsha erekshelep, jańasha atap ótýimiz keregin aıtty. Iаǵnı bul qadam qoǵamdy uıystyryp, ulttyq biregeıligimizdi aıshyqtap, el birligin nyǵaıta túsýge yqpal etetini anyq.
Salıqaly suhbattyń salmaqty tusy az emes. Eldiń qazirgi jaǵdaıy men keleshegi jóninde kóp maǵlumatqa qanyqtyq. Memleket basshysy erekshe atap ótkendeı, «eńbekqorlyq, bilimpazdyq, kásibılik, birlik, yntymaq, jańashyldyq, iskerlik, bastamashyldyq, adaldyq, qarapaıymdylyq jáne únemshildik – naǵyz otanshyl, adal azamatqa tán qasıetter men qundylyqtar». Osy qasıetter men qundylyqtardy jan-jaqty dáriptep, urpaq sanasyna sińirý – basty boryshymyz. Bul oraıda elimizdegi bilim salasynyń ustazdary, oqytýshylary, professorlary men ǵalymdary tereń sezinip, abyroımen atqarýǵa kúsh-jigerimizdi, búkil tájirıbemizdi jumsaýǵa mindettimiz.
Bekjigit SERDÁLI,
Q.A.Iаsaýı atyndaǵy Halyqaralyq qazaq-túrik ýnıversıtetiniń professory, kompozıtor