27 qańtar kúni oblystyq onkologııalyq dıspanserde «Ashyq esik» kúni ótti. Is-sharanyń maqsaty – turǵyndardy qaterli isik aýrýynan saqtandyryp, aldyn alý. Osy maqsatta onkologııalyq ortalyqta 20 kabınet jumys istep, dárigerler migirsiz eńbek etti, dep habarlaıdy Egemen.kz Qoǵamdyq kommýnıkasııa ortalyǵy óńirlik onkologııalyq dıspanserdiń baspasóz qyzmetine silteme jasap.
Tańǵy saǵat 09.00-den bastap, túski 13.00-ge deıin esigin aıqara ashqan onkologııalyq ortalyqqa 101 turǵyn kelip, óz densaýlyǵyn tegin teksertip, mamandardan aqysyz aqyl-keńes alyp úlgerdi. Onyń 17 adamyna qaterli isik aldy degen dıagnoz qoıylyp, 5 turǵyn osy aýrýǵa shaldyǵýy múmkin dep tanyldy. Budan basqa 10 adamnan basqa da túrli aýrýlar tabylyp, olarǵa qajetti dárigerlik keńester berildi.
Sondaı-aq sıtalogııalyq tekserýden – 74 adam, ÝZI apparatynan – 60, mammografııadan – 31 jáne tómen dozaly KT qurylǵysynan – 27 adam ótip, jalpy sany 192 tekserý taǵaıyndaldy.
Respýblıkalyq onkologııa jáne radıologııa ǵylymı-zertteý ınsıtýtynyń málimeti boıynsha, ótken jyly elimiz boıynsha, 2035 áıelge jatyr moıyny obyry dıagnozy qoıylǵan. Jyl saıyn bul aýrýdan 40-44 jas aralyǵyndaǵy 600-ge jýyq názik jandy qaıtys bolady eken. Mamandar qaterli isik dertine salǵyrt qaramaı, der kezinde medısınalyq tekserýden ótip turýǵa keńes beredi.
Aıta keteıik, mundaı tegin tekserýler oblystyq onkologııalyq dıspanserde turaqty túrde uıymdastyrylyp otyrady.