Ulttyq qordan 18 jasqa deıingi árbir balanyń jeke esepshotyna aýdarylǵan qarajat túse bastady. Kópshilik buǵan deıin ár balanyń jeke shotyna 150-160 AQSh dollary mólsherinde qarajat aýdarylady dep sengen. Dese de 1 aqpannan bastap ár balaǵa 100 dollar 50 sentten tústi, dep habarlaıdy Egemen.kz.
Qarjy vıse-mınıstri Dáýren Temirbekov munyń sebebin bala týý kórsetkishimen baılanystyrdy.
«Ulttyq qordan balalardyń esepshotyna qarajat aýdarý týraly Memleket basshysy Q.Toqaev 2022 jyly Joldaýynda aıtty. Sol kezdegi esep boıynsha Prezıdent tapsyrmasyna sáıkes 18 jasqa deıingi ár balanyń jeke esepshotyna 150-160 AQSh dollary mólsherinde túsedi dep baǵamdadyq. Ol kezde elimizdegi kámelettik jasqa tolmaǵan balalardyń sany 6 mıllıon 400 bolatyn. Búginde balalardyń sany 6 mıllıon 917 myńǵa jetti. Ulttyq qordan bólingen qarajattyń somasy – 695 mıllıon dollar. Osy somany 6 mıllıon 919 myń 131 balaǵa bólgende 100 dollar 50 sentten aýdaryldy», dedi vıse-mınıstr.