Qazaqstannyń eki birdeı kásipqoı boksshysy jarqyn jeńisterimen jankúıerlerin qýantty. Olar – Angelına Lýkas pen Asqat Jantursynov.
Angelına Lýkas Ázerbaıjannyń astanasy Bakýde ótken jarysta pákistandyq Roma Iýsafpen qolǵap túıistirdi. 26 jastaǵy Taraz qalasynyń týmasy alǵashynda áýesqoılar arasynda eleýli tabystarǵa qol jetkizdi. El chempıony atandy, birqatar halyqaralyq dodada daralandy. 2021 jyldyń jeltoqsan aıynda kásipqoı rıngtegi tusaýkeser kezdesýin ótkizdi. Sol kezden beri alty jekpe-jek ótkizip, beseýinde jeńiske jetti. Eki qarsylasyn nokaýtqa jiberdi. Qysqa ǵana merizimde UBO jáne WBC International nusqalary boıynsha altyn belbeýdi ıelendi.
25 jastaǵy Roma Iýsaf ta osaldar sanatynan emes. Ol bes básekeniń barlyǵynda basymdyq tanytty. Qos myqty asa jeńil salmaqtyń WIBA nusqasynyń chempıondyq ataǵy úshin talasty. Biraq Pákistannyń ókili jerlesimizge laıyqty qarsylyq kórsete almady. Segiz raýndqa eseptelgen kezdesý birinshi raýndta aıaqtaldy. Báseke bastalǵan bette Lýkas Iýsafty esinen tandyryp, altyn belbeýdi ıelendi.
Dál sol jarysta óner kórsetken asa aýyr salmaqtaǵy Asqat Jantursynov ta kópshiliktiń qoshemetine bólendi. Osyǵan deıin ol jeti ret sharshy alańǵa shyǵyp, alataýynda jeńiske jetken edi. Bes qarsylasyn uryp jyqty. Bakýde Asqatqa grýzııalyq Mýgavıl Musaevty aıqyn jeńý úshin nebári 12 sekýnd jetkilikti boldy.