Ortalyq kommýnıkasııalar qyzmeti alańynda ótken brıfıngte qaldyqtardy qaıta ıgerýge qatysty birqatar másele aıqyndalyp, naqty bastamalar qolǵa alynǵany týraly aıtyldy.
Ekologııa jáne tabıǵı resýrstar mınıstri Erlan Nysanbaev óńir ákimdikterine kommýnaldyq qaldyqtardy ıgerip, retteýge mindet júktelgenin jetkizdi.
– Ákimdikterdiń aqparatyna sáıkes, elimizdegi 207 qala men aýdan ortalyqtarynan 130 eldi mekende ártúrli kezeńderde qaldyqtardy bólek jınaý, 103 eldi mekende suryptaý jelileri jáne qolmen suryptaý uıymdastyrylǵan. 2023 jyly respýblıka boıynsha qatty turmystyq qaldyq polıgondarynyń sany 3 016 boldy. Onyń ishinde, ókinishke qaraı, ekologııalyq jáne sanıtarlyq normalarǵa sáıkesi – 624 ǵana (ıaǵnı 20,6%). Ákimdiktermen jáne ortalyq memlekettik organdarmen (О́nerkásip jáne qurylys, densaýlyq saqtaý, tótenshe jaǵdaılar mınıstrligi) birlesip, eldi mekenderde qatty turmystyq qaldyq polıgondaryn resimdeý tetikteriniń pysyqtalyp jatqanyn aıtyp ótken jón. Máselen, osy oryndarǵa qoıylatyn mindetti eń tómengi ekologııalyq, sanıtarlyq-epıdemıologııalyq jáne qurylys salasyndaǵy talaptar talqylanyp jatyr, – dedi E.Nysanbaev.
Onyń aıtýynsha, ákimdikterge qaldyqtardy basqarý ınfraqurylymyn damytýǵa qajetti quzyretter berilip otyr. Atap aıtqanda, jer ýchaskelerin berý, ınfraqurylym tartý tásilderin ázirleý, ekologııalyq emıssııalardy paıdalaný, bıznes sýbektilerine artyqshylyq (preferensııalar) berý, memlekettik-jekeshelik áriptestik sharttaryn jasasý boıynsha quzyretteri bar. Ákimdikter kommýnaldyq qaldyqtardy ıgerý baǵdarlamalaryn ázirlep jatyr.
Elimizde qaldyqtardy ıgerýge qatysty taǵy bir jańalyq málim boldy. Endigi ýaqytta qaldyqty qaıta óńdeýshilerge «elektrondy aýksıon» qaǵıdatymen qaldyq satýǵa múmkindik beretin aqparattyq júıege tirkelý bastalady.
– «EcoQoldau» avtomattandyrylǵan júıesi iske qosyldy. Jaqyn arada óńirlerdi materıaldyq-tehnıkalyq jaraqtandyrýǵa baǵyttalǵan jobalardy qarjylandyrý bastalady. «EcoQoldau» qaldyqtardy basqarý salasyndaǵy bıznes úderisterdi jeńildetip, eldegi ekologııalyq ahýalǵa oń áser etedi. 2021 jyly osy maqsatta 6,1 mlrd teńge tólendi. Onyń ishinde avtokomponetterdi qaıta óńdeýge – 1,1 mlrd teńge, plastık, karton, shyny qaptamalardy qaıta óńdeýge 5 mlrd teńge tólendi, – dedi «Jasyl damý» AQ basqarma tóraǵasy Erjan Sársenbaı.
Sondaı-aq ol «EcoQoldau» avtomattandyrylǵan júıesi arqyly qaldyq satý qalaı iske asatynyn túsindirdi.
– Birinshi jeke nemese zańdy tulǵa mobıldi qosymsha arqyly júıege tirkelip, jınalǵan qaldyqty satatyny týraly ótinim qaldyrady. Odan ári qaldyq jınaýshylar óz baǵalaryn usynyp, qaldyq ıesinen ony satyp alady. Jınaýshylar aı boıy jınaǵan qaldyq týraly derekti «EcoQoldau» júıesine engizip, habarlandyrý jarııalap otyrady. Jınaýshylar kóńilinen shyqqan satyp alýshymen kelisimshart jasaıdy. Odan keıin jınaýshy qaldyqty tasymaldaý jóninde habarlandyrý shyǵarady. Al ony kimniń tasıtynyn qaldyq ıesi derbes tańdap, qaldyqty qaıta óńdeýshige deıin jetkizý týraly kelisimshart jasasady. Qaıta óńdeýshi senimdi salmaq ólsheıtin qural arqyly satyp alynǵan qaldyqty qabyldap, tıisti aktige qol qoıady. Osydan keıin qaldyqty satýshy men qaıta óńdeýshi operatorǵa esep jiberedi. Sol eseptiń negizinde tólem jasalady. Qaldyq satýshy aıaqtalǵan aıdyń esebin kelesi aıdyń 15-ine deıin, qaldyq óńdeýshiler tolǵan toqsannyń esebin kelesi aıdyń 25-ine deıin jiberýi kerek. Bul úderis aqparattyq júıege tirkelgen barlyq paıdalanýshyǵa qoljetimdi. Baǵa saıasatyn naryqtyq qatynas retteıdi, – dedi E.Sársenbaı.