Memleket basshysynyń tóraǵalyǵymen ótip jatqan Úkimettiń keńeıtilgen otyrysynda ulttyq ekonomıkany damytýdyń mańyzdy alǵysharttary aıtyldy, dep jazady Egemen.kz Aqordanyń baspasóz qyzmetine súıenip.
«Aldymyzda ulttyq ekonomıkany sapaly ári qarqyndy damytý degen óte mańyzdy mindet turǵanyn tereń túsiný qajet. Tabys pen múlikke salyq salýdyń jańa júıesin engizbesek, kásipkerlerdi tabysyn qaltaǵa baspaı, bıznesin damytý úshin jumsaýǵa yntalandyrmasaq, arnaıy salyq rejımderin ózgertpesek, bul mindetti oryndaı almaımyz. Sondyqtan Salyq kodeksi sekildi strategııalyq mańyzy bar qujatty ázirleýge osy sala mamandarynan bólek ekonomıster men bıznes ókilderi jumyldyrylýy qajet. Árıne, bıýdjet qorjynyn toltyrý mindetin umytýǵa bolmaıdy. Ekonomıka neǵurlym qýatty bolsa, soǵurlym kóp salyq túsedi degen qaǵıdatty berik ustaný kerek. Salyqty jaıdan jaı kóbeıte salýǵa bolmaıdy. Eń aldymen, salyq salý júıesin rettep, ony jetildirý qajet. Sondaı-aq kóleńkeli ekonomıkany barynsha azaıtý kerek. Iаǵnı, salyq júıesin basqarý jumysy durys jolǵa qoıylmasa, eń ozyq degen salyq saıasatynyń ózi tıimsiz bolyp shyǵady. Úkimet salyq jeńildikterin berýdiń ashyq ári naqty erejelerin ázirleýge tıis. Qarjy mınıstrliginiń málimeti boıynsha jeńildik berýdiń saldarynan jyl saıyn bıýdjetke ortasha eseppen 7 trıllıonǵa jýyq teńge kem túsedi», dedi Q.Toqaev.
Prezıdent buǵan deıin de salyq jeńildikterin 20 paıyzǵa azaıtý týraly tapsyrma bergenin, biraq, áli kúnge deıin oryndalmaǵanyn synǵa aldy. Tipti burynǵy Úkimet máseleniń sheshý jolyn da ázirlemegenin eskertti.
«Mıkro jáne shaǵyn kásipkerlik úshin eńbekaqy tóleý qorynan bir rettik tólem jasaýdy engizý isi de aıaqsyz qaldy. Bul normanyń engizilgenine bir jyldan asty. Ýákiletti organdar jumystyń tabysty atqarylǵany týraly esep berdi. Al bıznes ókilderi burynǵysynsha salyq pen jarnany bıýdjettik emes qorlarǵa jeke-jeke tóleýdi jalǵastyryp jatyr. Bir jaǵynan, orta bızneske naqty qoldaý kórsetý máselesine aıryqsha mán berý kerek. Mysaly, kóp jaǵdaıda bıznesti qoldan usaqtap jatady. Kásipkerlerdi tıisti sanatqa bólý ádistemesi durys jolǵa qoıylmaǵan. Memlekettik satyp alý jáne memlekettik qoldaý sharalaryn usyný kezinde orta bızneske basymdyq berilýi kerek. Osy máselelerdi mindetti túrde sheshý qajet. Bızneske ákimshilik qysym kórsetýdi azaıtý kerek, sonyń ishinde retteý qaǵıdatyn qoldaný arqyly yqpal etýdi doǵarǵan jón», degen Memleket basshysy bul salaǵa túbegeıli ózgeris jasaıtyn kez kelgenin aıtty.