Prezıdenttiń keńeıtilgen jıyndaǵy sózinde kóp nárse aıtyldy. Áriptesterim, Májilis pen Senat depýtattary, ózderine jaqyn taqyryptar týraly pikirlerin jetkizip, jazyp jatyr. Men de eń mańyzdy bolyp kóringen myna máseleni túrtip aldym.
Birinshi – syrtqy saıasat. Prezıdent: «Dúnıejúzinde jaǵdaı óte kúrdeli» degen jumsaq sóziniń artynda, jaǵdaıdyń álde qaıda qıyn ekenin ańǵarýǵa bolady. Aınalamyz – soǵys nemese qyrǵı-qabaq qarym-qatynasqa toly kórshiler. Reseı men Ýkraına, Izraıl men Palestına, Qytaı men Taıvan, Ázerbaıjan men Armenııa jáne t.s.s. Osyndaı óliara shaqta Qazaqstannyń dıplomatııasy tynysh, sapaly, múddeli jumys isteýi úshin ishki atmosfera durys bolý kerek. Eldiń ishin túzesek, dıplomattar da alańsyz óz isin alyp shyǵatynyna kúmán joq.
Ekinshi – jol. Es bilgeli joldyń jyry bitken emes. «Semeı-Almaty», «Semeı-Aqsýat» sııaqty tozǵan joldarmen júrgen adam retinde aıta alamyn. Jalpy, Prezıdent jol máselesin alǵash ret kóterip jatqan joq. Talaı aıtty. Biraq jol salasyndaǵylardyń bitirgeni shamaly. Álde olarǵa asa qatań jaza qajet pe? Egemendigine 32 jyl bolǵan el úshin «Almaty-Astana» avtobanynyń bolmaýy – uıat qubylys. Jol – logıstıkanyń kúre tamyry, týrızmniń negizi. «Aqtaý-О́skemen» avtobanyn salý kerek dep kúlip te aıttyq, jylap ta aıttyq. Búkil Qazaqstannyń qalalary bir-birimen baılanysý kerek. Sonda nátıje bolady. Aıtýǵa uıat – Qyzylordanyń qazaǵy Aqtaýǵa barý úshin Aqtóbege deıin júrý kerek. Absýrd qoı. Qysqasy, bıyl Almaty men Astananyń joly aınadaı bolýǵa tıis. Prezıdent aıtty – jasalady.
Úshinshi – baılar. «Urlanǵan kapıtaldy elge qaıtarý» degen bastama durys. Alaıda sony jeleý etip, óz eńbegimen baıyǵan kásipkerlerge zııanyn tıgizetin kúshtik qurylymnyń ókilderine de jazany qatańdatý kerek. Prezıdent sózinde osy keısti aıtty. 1928 jyly baılardy qýdalaǵan tóńkeristiń nemen aıaqtalǵanyn kórdik. Ult olıgarhtar men kedeılerden turmaıdy, ultty turaqtandyratyn – orta tap. Orta tap azaıǵan qoǵamda tóńkeristiń ıisi shyǵady. Orta taptyń kóbeıýine Úkimet te, qoǵam da múddeli. Shaǵyn jáne orta bıznesti qoldap, qýdalamaı, jaǵdaı jasasa, qoǵamda orta taptyń úlesi artary anyq. Toqsan aýyz sózdiń tobyqtaı túıini: Prezıdent Oljas Bektenovke kart-blansh berdi. Endi Oljas Abaıuly nátıje kórsetýi kerek.
Samat NURTAZA,
Májilis depýtaty