Qorǵanys vedomstvosynyń basshysy general-polkovnık Rýslan Jaqsylyqov óńirde áskerı ınfraqurylym nysandaryn jáne aldaǵy oqý-jattyǵýlarǵa daıyndyq barysyn tekserdi, dep jazady Egemen.kz Qorǵanys mınıstrliginiń baspasóz qyzmetine silteme jasap.
«Qonaev garnızonynyń «Jaǵalaý» polıgonynda Qorǵanys mınıstri Desanttyq-shabýyldaý áskerleri qolbasshysynyń baıandamasyn tyńdady. General-maıor Almaz Jumakeev UQShU-nyń «Myzǵymas baýyrlastyq-2024» Ujymdyq bitimgerlik kúshterimen ótetin oqý-jattyǵýǵa daıyndyq týraly baıandady.
Armııa avıasııasynyń tikushaǵymen general-polkovnık Rýslan Jaqsylyqov «Shoshqaly» polıgonyn aınalyp ushyp ótti.
Mınıstr 65229 áskerı bólimine baryp, onda áskerı nysandardy aralap, Áýe shabýylyna qarsy qorǵanys áskerleriniń avıasııalyq tehnıkasy men qarý-jaraǵyn ustaý sharttarymen tanysty.
Qarýly kúshter Memlekettik áskerı-tarıhı mýzeıiniń fılıalynda Qorǵanys mınıstri obektiniń kólem qurylymyn ulǵaıtý jáne ekspozısııalyq zaldardy jańartý maqsatynda júrgizilip jatqan jóndeý jáne qalpyna keltirý jumystarynyń barysyn tekserdi. Mýzeı bastyǵy Alýa Baıqadamovamen kezdesýde general-polkovnık Rýslan Jaqsylyqov jumystardy sapaly jáne ýaqtyly oryndaý qajettigine nazar aýdardy.
Sapar aıasynda vedomstvo basshysy Qorǵanys mınıstrliginiń Bitimgerlik operasııalar ortalyǵyna da at basyn tirep, ınfraqurylymdyq nysandardy aralap, ulttyq kontıngentti BUU-nyń Golan jotalaryndaǵy bitimgerlik mıssııaǵa jiberýge qatysty birqatar nusqaý berdi», delingen aqparatta.
Mınıstr Almaty qalasyndaǵy Ortalyq áskerı emhanany aralap, mekemeniń emdeý-dıagnostıkalyq jabdyqtarmen, tıisti quraldarmen jáne dárilik zattarmen qamtamasyz etilýimen tanysty. Mınıstr bekitilgen kontıngentke sapaly ambýlatorlyq-emhanalyq jáne konsýltasııalyq-dıagnostıkalyq kómek kórsetý qajettigin aıtty.