Jýyrda Nıý-Iorktegi BUU shtab-páterinde Golan jotalaryndaǵy bólingen jerlerdi «BUU-nyń baqylaý kúshteri» (SONNR) mıssııasyna bitimgerlik kontıngentti jiberý úshin Qazaqstan Respýblıkasynyń Úkimeti men Birikken Ulttar Uıymy arasynda ózara túsinistik týraly memorandýmǵa qol qoıyldy.
Osylaısha, Birikken Ulttar Uıymy elimizge bitimgerlik mıssııany óz betinshe jiberýge jáne oryndaýǵa alǵash ret mandat berip otyr. Qazaqstan kontıngentiniń quramynda 139 áskerı qyzmetshi bar. Bizdiń bitimgerler BUU mıssııasynyń mandatyna sáıkes qarsylas taraptar arasynda atysty toqtatý rejimin saqtaý mindetterin oryndaıtyn bolady.
Mıssııany oryndaý úshin áskerı qyzmetshilerimiz BUU talaptary men standarttaryna sáıkes muqııat irikteýden jáne daıarlyqtan ótti. Keshendi alty aılyq daıyndyq Qorǵanys mınıstrliginiń Bitimgerlik operasııalar ortalyǵynda uıymdastyryldy. Olardy oqytýǵa bitimgerlik operasııalar, mınadan tazartý jáne áskerı medısına ortalyqtarynyń nusqaýshylar quramy qatysty.
Áskerı qyzmetshiler aǵylshyn tilin, kúsh qoldaný erejelerin, halyqaralyq jáne gýmanıtarlyq quqyq normalaryn oqydy. Bitimgerlik bazany qorǵaý, tosqaýyl beketterin uıymdastyrý, patrýldeý, jarylǵysh qurylǵylardy zalalsyzdandyrý, kómek kórsetý jáne evakýasııalaý boıynsha mindetterdi is júzinde pysyqtady.
Tájirıbelik daǵdylardy jáne kontıngent shtabynyń ofıserlerimen jedel úılesimdilikti arttyrý úshin jedel-taktıkalyq deńgeıde áskerı sheshimder qabyldaý sabaqtary ótti. Sarapshylardyń baǵalaýynsha, kontıngent jeke quramy joǵary daıyndyq deńgeıin kórsetip otyr.
Qorǵanys mınıstrligi mıssııany BUU-nyń standarttaryna sáıkes qarý-jaraq pen áskerı tehnıkanyń zamanaýı úlgilerimen jan-jaqty qamtamasyz etý jóninde aýqymdy is-sharalar keshenin júzege asyrdy. Kontıngentte jaýyngerlik modýldermen jabdyqtalǵan brondalǵan dóńgelekti mashınalar, sondaı-aq kúndelikti tirshilikke qajetti jabdyqtar bar. Olardy qamtamasyz etýge júk kólikteri, jol talǵamaıtyn avtokólikter jáne ınjenerlik qural-jabdyq jetkilikti. Jaralylardy evakýasııalaýǵa berilgen mashınalardyń biri ottegi apparatymen, defıbrıllıatormen, dári-dármektermen jáne basqa da medısınalyq jabdyqtarmen qamtamasyz etilgen.
Mıssııany atqarý kezinde bitimgerlik kontıngentiniń áskerı qyzmetshilerine aı saıynǵy jalaqysy úsh ese tólenedi. Buǵan qosa, BUU bıýdjetinen olar aı saıyn 1448 dollardan asa qarajat alady. Qyzmet aıaqtalǵannan keıin áskerı qyzmetshiler shıpajaılarda emdele alady, negizgi demalysqa jyl saıyn qosymsha 14 táýlik qosylady.
Tutastaı alǵanda, elimizdiń Qarýly kúshteri bitimgerlik mıssııalarǵa áskerı baqylaýshylar men shtab ofıserleri retinde jekelegen áskerı qyzmetshilerdi de, sondaı-aq jaıaý ásker, medısınalyq, barlaý sııaqty neǵurlym qajetti mamandandyrylǵan bólimshelerdi de jiberýge daıyn.
Aıta ketsek, keıingi on alty jyl ishinde 600-den astam áskerı qyzmetshimiz BUU-nyń Azııa, Taıaý Shyǵys jáne Afrıka elderindegi jeti bitimgerlik mıssııasyna qatysqan. Qazirgi tańda 19 jaýyngerimiz BUU-nyń Lıvan Respýblıkasyndaǵy, Batys Saharadaǵy, Kongo Demokratııalyq Respýblıkasyndaǵy jáne Ortalyq Afrıka Respýblıkasyndaǵy bitimgerlik mıssııalarynyń quramynda qyzmet etip júr.