Elordanyń «Jastar» teatrynda Qazaqstannyń halyq jazýshysy, dramatýrg, Memlekettik syılyqtyń laýreaty Sáken Júnisovtiń 90 jyldyǵyna arnalǵan «Sulý sózdiń súleıi» atty ádebı-sazdy kesh ótti. Taǵylymdy is-sharaǵa ǵalymdar, aqyn-jazýshylar men óner maıtalmandary qatysty.
Kesh shymyldyǵy ánshi Sáýlejan Taqzııanyń oryndaýyndaǵy Sáken Seıfýllınniń «Taý ishinde» ánimen ashyldy. Serilik saltanatynda sanattas ári attas Sáken aǵasynyń áni jazýshynyń janyn dál sýrettep, bolmys boıaýyn anyq kórsetetindeı kórindi. Bálkim, osy sebepten kórermen qaýym ánmen birge áýelep, ánshimen birge shyrqap otyrdy.
Ádebı-sazdy kesh ári qaraı avtordyń «Jaraly gúlder» pesasynyń jelisimen qoıylǵan rejısser, Memlekettik syılyqtyń laýreaty Nurqanat Jaqypbaıdyń «Tyraý-tyraý, tyrnalar» dramasyna ulasty. Soǵys jyldaryndaǵy qaıǵy-qasiretti kórsetken qoıylym úzindisi kópshiliktiń kóńilin tolqytty, júregin tebirentti.
Al aıtysker aqyn Meıirbek Sultanhan Sáken Júnisovtiń qalamgerlik, qaıratkerlik portretin, ónegeli ǵumyryn óleńmen órnektedi. «Qulagerdi joqtaǵan Aqan bolsa, Aqandy joqtatpaǵan Sáken seri!» deıdi ol.
Qazaqstan Jazýshylar odaǵy basqarma tóraǵasynyń orynbasary, aqyn Baýyrjan Jaqyp sóz alyp, Sáken Júnisovtiń sanqyrlylyǵyna erekshe toqtaldy.
«Ol kisini kózimiz kórdi. Qanattas inisi bolyp qatar júrdik. Almatyda Muhtar Áýezov atyndaǵy ulttyq teatrda ótken mereıtoıynda Sáken aǵanyń ıtalııa tilinde shyrqaǵan arııasyna tańdanbaǵan, tamsanbaǵan adam qalmady. Al onyń dramatýrgııadaǵy, aýdarma salasyndaǵy ónimdi eńbegi áli de úlken zertteýlerdi talap etedi. Sondyqtan eli barda osyndaı erdiń esimi eshqashan umytylmaq emes. Ol qazaq halqymen birge jasaıdy», dedi ol. Aqyn odan keıin jazýshyǵa arnaǵan óleńin oqydy.
Al aqyn, manasshy Baıanǵalı Álimjanov Sáken Júnisovtiń shyǵarmashylyǵyna toqtalyp, onyń bıik deńgeıdegi azamattyq bolmysyn basa aıtty.
«60-jyldary qazaq ádebıeti aspanynda nebir juldyzdar jandy. Alaıda sol juldyzdardyń ishinde eń jaryǵy Sáken aǵam edi. Ol kisi ádebıetke jarq etip, «Japandaǵy jalǵyz úımen» keldi. Odan keıin «Aqan seriniń» eki tomyn jáne «Amanaı men Zamanaıyn» berdi. Bul – qazaq ádebıetiniń qazynasyna qosqan aǵamyzdyń eń úlken tartýy. Sákendi zamandastary tentek deıdi. Biraq ol – esti tentek edi. Sózge toqtaıtyn ýáli azamat edi. Birde Seıitjan Omarov deıtin jazýshymen Sáken Júnisov sózge kelip qalady. Tabıǵatynan momyn Seıitjan aqsaqal esh daýys kótermeıdi. Tek qana «Áı, Sáken... Tabıǵattyń zańy boıynsha men senen erterek ketemin ǵoı. Sonda ákeń Nurmaqqa aıtarmyn, Sáken meni renjitti dep», deıdi. Osy sózden keıin aǵamyz qatesin túsinip, birden keshirim suraǵan eken. Keıin osy oqıǵasyn óle-ólgenshe ónege bolsyn dep aıtyp júrdi jaryqtyq», dedi B.Álimjanov.
Maǵjan Jumabaev atyndaǵy Aqmola oblystyq ámbebap ǵylymı kitaphanasynyń dırektory Qýanysh Ospanov kitaphanada Sáken Júnisov atyndaǵy májilis zaly ashylatanyn habarlady. Aqjoltaı jańalyqqa Qazaqstan Jazýshylar odaǵynyń Astana qalasyndaǵy fılıalynyń dırektory Dáýletkereı Kápuly ún qosyp, kitaphanaǵa áıgili fotograf Shúkir Shahaı túsirgen jazýshynyń jıyrma sýretin syıǵa tartatyn boldy. Sonymen qatar Sáken Júnisovtiń 90 jyldyǵyna oraı ulttyq akademııalyq kitaphanada ǵylymı konferensııa da ótetinin habarlady.
Kesh sońynda qalamgerdiń qaryndasy Roza Júnisova aq tilegin aıtyp, jıylǵan qaýymǵa alǵysyn bildirdi. Saltanatty is-sharanyń ótýine muryndyq bolǵan Jazýshylar odaǵy Astana fılıaly men Astana qalasy ákimdigi ónerpazdardy yqylas gúlimen quttyqtady.